JAMITA MINGGU NASOMAL 29 - PARBARITA.com

 

Minggu Nasomal XXIX

Jes. 45:1.4-6; Ps. 96:1+3.4-5.7-8.9-10a+c; 1Tes 1:1-5b; Mat. 22:15-21

Hamu angka dongan! Dibagasan Barita Nauli, dilehon do sungkunsungkun tu Jesus: “Beha didok roham, na jadi do lehonon guguan tu Kesar i, manang na so jadi tahe?” Molo ‘boi’ do alusNa, didok ma Ibana dongan ni angka parjahat. Ale molo ‘ndang boi’ alusNa, didok ma Ibana gabe sahalak musu (ndang aleale ni Kesar).

Alai diboto Jesus do na jahat ni rohanasida. Disuru ma nasida asa patuduhon hepeng guguan i, laos disungkunma, “Gombaran dohot surat ni ise do dison?” Dialusi halaki do, “Gombaran ni Kesar i do.” Diuduti Jesus ma mandok, “Lehon hamu ma tu Kesar, na sian Kesar i, jala lehon hamu ma tu Debata, na sian Debata!”

Lapatan ni alus ni Jesus i ndang nagabe dibagibagi ngolunta, satonga tu ngolu pardagingon (portibi), satonga nai tu ngolu partondion (Debata). Na gabe sungkunsungkun tu hita, aha ma na gabe silehonta tu Debata? Di hepeng guguan i adong gombar ni Kesar, alai ianggo di dirinta adong gombar ni Debata. Ditompa do hita tumiru gombar dohot rupaNa. Alani i, hepeng guguan i pamarenta do nampunasa, alai anggo ngolunta Debata do ianggo nampunasa; pingkiran, roha, daging, tingki, karejo dohot angka na tarpasinta.

Dibagasan panjahaon na parjolo dipaingot do ima Debata mamangke halak na asing ima Raja Koresh, laho mangulahon sangkap ni rohaNa. Ndada ditanda Raja Koresh atik ise Debata, alai tongtong do dibagasan gomgoman ni Tuhan nasida. On gabe parsiajaran di hita, ia huaso ni Debata ndada boi tapingkiri. Atik ise pe i jala songon dia pe situasina, boi do dipangke Debata laho mangulahon angka na denggan.

Ala ni i, sahalak Kristen di jou asa unduk dipanggomgomi na marsahala: mangulahon angka na denggan, unduk tu uhum, jala dohot pamajuhon huta na be. Alai habasaon tu na marsahala ndang gabe mangganti manang mangorui habasaon tu Debata. Molo huaso i mambahen na jahat, manindos napogos dohot na gale, manang ndang manghatindanghon na sintong, ingkon tongtong do ta ingot, ngolunta on Debata do nampunasa.

Apostel Paulus mamuji Huria di Tesalonika ala mamparbue do haporseaonnasida. Di nasida, Barita Nauli ndada holan hatahata sambing, alai mian gabe gogo dibagsan Tondi Porbadia. On ma haporsean na togu. Ndada holan parbinotoan taringot tu uhum manang poda di ugamo, alai haporseaon i paubahon dirinta, mulai sian caranta mulaulaon, manghatai, dohot marsaor tu angka na asing. Debata mangaramoti. Amen.