.jpeg&description=JAMITA MINGGU NASOMAL 28){kind=link}
Minggu Nasomal XXVIII
Jes. 25:6-10a; Ps. 23:1-3a.3b-4.5.6; Plp.
4:1-14.19-20; Mat. 22:1-14 (1-10)
Gabe Sahalak na Tarjou
jala Tarpillit
Hamu
angka dongan na hinaholongan! Dibagasan angka panjahaon sadarion dipatorang do
taringot tu gokhon dohot joujou ni Debata jala boa alus ta di gokhon dohot
joujou i. Digombarhon Panurirang Jesaya do haluaon i gabe sada pesta bolon na
pinarade ni Debata tu sude bangso. Diapusi Debata angka ilu, manaluhon
hamatean, jala mangalehon si las ni roha tu angka ruasNa. Alani i, haluaon
ndang didapot marhite hagogoanta. Alai haluaon i gabe sada basabasa na ni
parade Debata tu hita.
.jpeg)
Dibagasan Barita Nauli, laos diuduti
Jesus do manggombarhon harajaon banua ginjang i marhite sada umpama taringot tu
sada raja na mamestahon anakna na mangoli. Dijou raja i do angka na torop, alai
dijua ndang olo ro. Adong na tu haumana, adong na tu partigatigaonna, jala
adong muse na mamusa naposo ni raja i. Ujungna dijou raja i do sude na
jumpanasida, atik pe halak na burju manang parjahat.
Marhite umpama on, dipaingot do
hita, ia Debata ndang hea olo so laho manjou hita tu hasonanganNa. Alai, jotjot
do hita manjua joujou i. Mian do hita dibagasan rimas. Ta pingkiri angka
ugasanta dohot ulaonta. Ta lupahon Debata na manjoujou hita. Dibagasan Barita
Nauli, didok do adong sada halak n aro tu pesta alai ndang marpangkean pesta.
Lapatan ni pangkean pesta ima tanda roha na olo muba. Ndang boi holan ngolu
pardagingon di Huria i. Dijou do hita asa mamangke holong, habasaron,
halambohon, jala mamparohahon donganta jolma.
Dibagasan panjahaon paduahon,
Apostel Paulus patuduhon songon dia do sahalak na marhaporseaon. Hea do ibana
hahurangan jala hea do tong lobian. Atik songon dia pe gulmit ni ngolunasida,
gomos do ibana marpanghirimon tu Debata. On ma sada tanda na porlu ta ulahon.
Haporseaon i ndang holan tarida ditingki denggan ngolunta, so ada mara. Alai
ingkon do tong tarida atik pe ro angka sitaonon jala porsea Debata mangaramoti.
Angka dongan na hinaholongan! Dijou
Debata do hita sadarion asa bongot tu bagasan pesta holongNa. Unang alani rimas
ta diangka arta portibi gabe ndang adong tingkinta tu Debata. Dung ta alusi
joujou i, ro ma hita dibagasan las ni roha, roha na olo muba, olo manesa dosa,
jala olo mangulahon hata ni Debata. Ai lan do na dijou, alai otik do na tarpillit.
Sai anggiat ma dipargogoi Debata hita di tingki sonang manang susa. Sai anggiat
ma ngolunta gabe tanda harajaon ni Debata tu angka donganta. Amen.