JAMITA MINGGU NASOMAL 25 - PARBARITA.com

 

Ari Minggu Nasomal XXV

Jes. 55:6-9; Ps. 145:2-3, 8-9, 17-18; Plp. 1:20c-2, 27a; Mat. 20:1-16a

Fr. Daniel Simatupang OFMCap.

            Damang dainang dohot angka dongan sahaporseaon! Hata ni Tuhan na ta tangihon sadarion mamboan hita tu sada pangarimangion na mansai jonok tu bagas parngoluonta. Dibagasan panjahaon na parjolo, didok Debata do tu si Jesaya: “Ai ndada pingkiranKu pingkiranmuna i, jala ndada dalanmuna angka dalanKu”. Dibaen hata ni Debata on gabe tarbungka ma pingkiran ta ianggo Debata ndang boi tarungkur ni ganup jolma molo holan marhite pingkiran sambing. Ndang boi tapingkiri huaso ni Tuhan i. Ale ianggo Debata, apala tangkas do diboto luhut gulmit ni parngoluanta.

            Alani gok ni hahuranganta, jotjot do gabe gale hita molo sipata ro angka singkal siambati. Sasintongna, marhite panjahaon sadarion, Debata mangajari hita asa tontong porsea tu Ibana. Hata ni Panurirang Jesaya songon on: “Sai lului hamu ma Jahowa, binsan tarbahen dope jumpang Ibana; jou hamu ma Ibana, binsan jonok dope Ibana”. Sada joujou do on asa mulak hita tu Debata. Molo hera na so denggan ari naung ta dalani, unang pintor mandao sian Tuhan; molo ndang maralus dope tangiang, unang pintor so martangiang. Laos di ombas i ma porlu hita lam jonokhon diri tu Debata marhite tangiang.

            Ninna Panurirang Jesaya do muse: “Sai ditadinghon halak parjahat i ma dalanna, jala jolma pargeduk i, angka sangkapna...”. Ganup jolma adong do “dalan” dohot “sangkapna” be, alai dipangido Debata do hita manadinghon i sude molo ndang sadalan tu lomo ni rohaNa. Halak na olo paubahon roha (bertobat) ima jolma na barani mamelehon sude giot ni roha na hu Debata: Tuhan, unang ma sangkaphu na saut, sangkapMu ma.

            Dibagas panjahaon paduahon, Apostel Paulus mandok: “Ai Kristus do hangoluan di ahu, jala laba nang hamatean.” Aha na laho dihatahon Apostel Paulus? Paulus laho pataridahon haporseaonna ianggo Kristus ma naung gabe unok ni ngoluna. Ndang dirina sandiri be disarihon, alai songon dia asa marlapatan tu Debata nang tu angka dongan. Na gabe sungkunsungkun di hita ima,  “Nunga ta bahen Kristus gabe nomor sada di ngolunta? Manang dirinta sandiri do na torus ta pingkiri?”

            Dibagasan Barita Nauli dihatahon tarsingot sahalak na mora na mangarahon pangula tu porlak anggur na. Adong na mangula di manogot, di arian, nang dohot mandapothon botari. Alai ditingki manjalo upa pangula i, sude do manjalo upa na dos. Aha ma lapatan ni i? Ndang hapingkiran ni jolma angka pambahenan ni Debata. Ganup jolma mambaen paretongan sian aha  naung diula, alai Debata mangalehon ala ni asi dohot holongNa. Pasupasu na dilehon Tuhan tu dongata ndang mamben moru holong ni Debata tu dirinta. Ra jotjot do hita pintor patudoshon diri molo adong di donganta; manang tubu roha na jahat marnida dongan na hasea.

            “Dung i laho muse ibana di pungkul lima...dohot ma hamu laho tu porlakhi”. Angka parkarejo na mandapothon botari pe disarihon Jesus dope. Sude do hita boi mandapot pangkirimon sian Debata asal olo mambungka roha tu Ibana. Dalan ni Tuhan ndang sai mura boi ta antusi, alai holong ni Tuhan sai tontong boi ta haporseai. Amen