JAMITA MINGGU NASOMAL 30 - PARBARITA.com

 

Ari Minggu Nasomal XXX  

2Mus. 22:21-27: Ps. 18:2-3a.3bc-4.47+51ab; 1Tes. 1:5c-10; Mat. 22:34-40

Fr. Asido Sidabariba, OFMCap.

Damang dainang dohot angka dongan na hinaholongan! Sai anggiat ma dame na sian Tuhan mian dibagasan rohanta ganup marsadasada. Sadarion i ma ari Minggu nasomal XXX.

            Di ari Minggu sadarion, dipasahat Debata do tu hita Barita Nauli taringot holong na gabe patik parjolo ni sahalak Kristen. Holong na gabe patik parjolo jala na sumurung i, dipatolhas Debata do parjolo sahali tu halak Israel tingki haruar sian tano Misir. Holong na sumurung i dipangido Debata asa diulahon jala dilehon halak Israel tu angka dongan nasida na metmet jala marungkil, i ma angka halak na leban, na mabalu, angka dakdanak na so maramamarina, dohot angka naporsuk. Nasida dipillit Debata gabe panjanghon holong sian halak Israel, siala jotjot do hagaleon nasida gabe tihas na mambahen nasida ndang margogo di tongatonga pangisi ni huta. Ima na mambahen nasida gabe jolma na so dianturehon, jala jotjot ditindos. Baliksa, Debata patuduhon holongNa tu nasida, marhite angka hata na dipasahat tu halak Israel, ima Debatanta I ima Debata si parholong roha. Di hata Latin jotjot do ra tabege hata “Misericordia” manang di hata Indonesia Allah Sang Kerahiman Ilahi. Hurang lobi i ma na umbahen Debata mangalehon roha laho manggomgomi angka jolma naso margogo.

            Angka dongan na hinaholongan! Tangkas do dipatanda Debata diriNa tu hita. Molo Debatanta i ma Debata na manangihon joujou ni angka jolma na marsurak tu Ibana. Tung mansai maralo do roha ni Debata tu roha ni angka jolma saonari na jotjot ndang mangalehon inganan tu angka jolma na metmet. Ta bereng dibagas ngolunta saonari, tung mansai godang do jolma na marhahurangan, alai olo do hita ndang marholong ni roha. Ra hea do taida di hutanta angka pangidoido. Jotjot jolma saonari ndang be pola olo tulus rohana mangalehon angka naringkot tu angka pangidoido i.

Marhite hata ni Debata sadarion, tangkas do taboto, panandaion ta tu Debata tarida do sian pangalahonta dompakhon dongan namarsitaonn, lumobi angka napogos.  Dibagasan Barita Nauli, lam dipatangkas Debata do muse patik i, ima tingki disungkun halak Parise tu Jesus aha ma na gabe patik na jumolo. Sungkun-sungkun i sasintongna ndang sian rohana, alai sungkun-sungkun na laho pagasiphon Jesus. Diboto Jesus do sasintongna sangkapni halak Parise i, alai dialusi Jesus do sian roha na. Patik na jumolo i adong do dua, parjolo ima manghaholongi Debata lobi sian nasa na adong, jala manghaholongi angka donganta jolma songon holong ta tu diri ta sandiri. Dua patik on ingkon porlu do taboto ndang boi dilupahon. Holong tu Debata ima holong na sada. Angka jolma na manghaholongi Debata naingkon do manghaholongi dongan na jolma, baliksa angka jolma na manghaholongi dongan na jolma tingkos do manghaholongi Debata.

Damang dainang dohot angka dongan napinarsangapan! Jotjot do ta tangingohon patik holong, alai jotjot do tong maol taulahon. Tamba ni i, porlu do tahaporseai molo angka jolma na manghaholongi Debata ima nasida na olo mangalehon rohana ditompa songon roha ni Debata. Antong damang dainang barani ma hita manungkun dirinta sandiri. Olo do ahu manghaholongi sude na dihaholongi Debata? Boha do parrohaonhu tingki mamereng donganhu napogos dohot na gale?

Saonari rap ma hita marguru tu ruas di Tesalonika na patuduhon haporseaonna marhite ulaon siganup ari. Ngolu nasida nunga be gabe tiruan tu angka na torop. Hita na marhaposan tu Debata pe ingkon do paubaon dirinta, patuduhon holong tu angka dongan na asing marhite ulaonta, ndada holan hata sambing. Rap ma hita paradehon diri, ta gogoi martangiang jala marhaposan tu Debata. Sai anggiat ma!