JAMITA MINGGU NASOMAL 27 - PARBARITA.com

 

Ari Minggu Nasomal XXVII

Hes. 5:1-7; Ps. 80:9+12.13-14.15-16.19-20; Plp. 4:6-9; Mat. 21:33-43

Fr. Johannes M. Saragih, OFMCap.

Gomos Marhaposan tu Holong ni Debata

Hamu angka dongan na hinaholongan! Molo mangalehon pangajarion dohot poda, jotjot do Jesus mamangke umpama asa lam diantusi angka na umbegesa baritaNa. Dipataridahon Barita Nauli sadarion do sada na sasintongna gabe pinsangpinsang na ditujuhon tu angka pamimpin agama di Jerusalem. Dung dipaias Bagas Joro i (21:12-32) jala dung diadopi huasoNa angka sintua ni malim dohot sintua ni bangso i (21:23-27), dialusi Jesus do i marhite tolu umpama uhum: anak na dua i (21:28-32), parkarejo ni porlak anggur i (21:28-32). (22:1-14). Sude na tolu i pataridahon panjuaon ni angka pamimpin ni Israel tu panjouon ni Debata jala mangondolhon panghorhon ni panjuaon i.

Umpama taringot u angka pangula ni porlak anggur i manggombarhon asi ni roha ni Debata tu bangso Israel, bangso na so hea ditadingkon Ibana, nang pe dipasahat Ibana Digombarhon do Israel songon ‘porlak anggur’ na dipasahat tu angka parkarejo, i ma angka uluan, i ma angka sintua ni bangso Jahudi. Porlak anggur on, songon na tabege nang di panjahaon na parjolo (Jesaya 5:1–7), bagas do disarihon jala disarihon Debata, hape tong do ndang denggan parbuena.

Sian holong ni rohaNa na mansai balga i, disuru Debata do angka panurirang di godang barita ni Padan na Robi laho pasahathon hataNa. Alai ditulak do angka panurirang on (ay. 34-36). Ujungna, disuru Debata do AnakNa sandiri – na martudutudu tu Jesus Kristus sandiri. Hape, di ujungna, dohot do Ibana ditulak jala pola dibunu. Songon na ditutup angka pamimpin ni Jahudi i do dirina tu lomo ni roha ni Debata, i ma lomo ni roha na tarida di angka panurirang jala na marpuncak di Jesus Kristus.

Hamu angka dongan! Jesus pe paingothon hita maradophon pangunjunan ni arta. Diparrohahon ibana do, angka parkarejo i, na mapitung ala ni hagiotna laho manampuna porlak anggur i. On paingothon hita, molo disoadahon jolma i panjouonna gabe dongan saulaon di sangkap ni Debata jala dipajongjong dirina gabe Debata, gabe turipurna ma ibana. Dohot hasangaponna songon anak ni Debata, gabe musu ma ibana tu angka donganna sandiri.

Hamu angka dongan na hinaholongan! Sahali nari dipasingot do hita taringot tu parmaraan ni roha na mangalului arta portibi on. Ingkon ingotonta do, saluhut na adong di hita silehonlehon ni Debata do i. Ndang pola holsoan hita sahat tu na manutup diri sian dongan, songon na pinasahat ni si Paulus di panjahaon paduahon (Pilippi 4:6). Holan na porlu do hita mangungkap dirinta tu holong ni Debata na mansai balga i. Holan na ringkot do hita maniop Ibana, Marhite i, boi do hita mambahen portibi na dumenggan rap dohot angka dongan. Pace e bene.