){kind=link}
Jesus Sandiri Paojakhon Ekaristi Nabadia
Damang dohot dainang na pinarsangapan
dibagasan dame ni Tuhanta Jesus Kristus! Dung salpu tareahon Ari Rea Debata Sitolu
Sada, sadarion tareahon ma ari na tung mansai tongam, sangap jala marmulia di
hurianta, ima Ari Rea Pamatang dohot Mudar ni Tuhanta Jesus Kristus. Dung
tahaporseai Debata Sitolusada i, tahaporseai ma jala taparbadiai ma muse Pamatang
dohot Mudar ni Kristus. On ma sada hasurungonta gabe sahalak katolik; adong
sada tingki di hita ima laho mangarajumi jala mangarimangi Ekaristi na Sunbadia
i, nata pe nian taulahon do i ganup ari dohot ganup ari Minggu.
Damang dainang na hinaholongan! Di
panjahaon parjolo, dipatolhas do tu hita taringot bangso Israel na mamelehon
pelean marhite lombu na dibinda, jala mudarna diparidihon si Musa tu bangso i. On
ma gabe sada tanda parpadanan ni Debata dohot bangso na tarpillit i. Mangulahon i nasida, marjanji do bangso i na
ingkon tangihonon jala ulaon ni nasida do sude patik na dipasahat ni Tuhan ala
nunga diparuar bangso i sian parhatobanon bangsa Misir.
Dung
i, di panjahaon paduahon, i ma sian Buku tu Halak Heber, dipatorang do tu hita
taringot Jesus Kristus na gabe pelean na imbaru manang padan na imbaru. Ndang
be songon na di Padan Narobi i: na ingkon marhite lombu do ruas/bangso i paiashon
diri jala mamelehon pelean parpadanan. Jesus, Anak ni Debata mangalehon DiriNa
sandiri gabe pelean na pita: Pamatang dohot MudarNa sandiri do pelean i. Jala
di Barita Nauli, dipatolhas do tu hita turiturian taringot Jesus na paojakhon
Ekaristi di borngin andorang diparsilangkon Ibana.
Damang
dainang! Unang ma nian golomgolom ria be haporseaonta i tu pangajarion taringot
tu ari rea sadari on. Ndang na binahenbahen sambing i di Hurianta. Jesus
sandiri do mamodahon i adopan ni angka ApostelNa: “On do dagingHu jala on do
mudar-Hu.” Roti dohot anggur naung dipasupasu marhite tangan ni Malim i, taharposeai
do tangkas gabe Pamatang dohot Mudar ni Kristus. Ndang holan tanda alai tung
toho do Daging dohot Mudar dibagasan rupa roti dohot anggur. Haporseaonta
manghatidanghon: Jesus sandiri do roti dohot anggur i. Jala didok Jesus do muse, “Ulahon hamu ma on,
gabe parningotan di Ahu” Aha lapatanna? Ingkon do taulahon na binahen ni Jesus
di borngin parpudi uju i. Jala i ma, na tatorushon muse rasirasa sadarion.
Ulaon Ekaristi na tareahon ganup ari manang ganup Minggu, ndang holan na gabe ulaon parningotan sambing i songon na
dihaporseai donganta Huria na asing, alai lobi sian i, Ekaristi do na gabe sada
sakramen di Hurianta, mangadophon Jesus na gabe gogo tu partondionta.
Mariaria
ma hita ala Jesusta ganup ari gabe sipanganon pargogo. Jonok do Ibana tu hita.
Mian do tongtong di partondionta. Jala muse, godang hita marguru tu Jesus. Tung
mansai serep rohaNa, ai nata pe Debata ale olo gabe jolma, gariada olo mian
gabe roti dohot anggur.
Marhite
hahomion sadarion, sai anggiat ma nian, lam holong hita tu Ekaristi. Lam arga
di hita parsidohot mamangan Daging dohot Mudar ni Kristus i. Ala Ibana nunga
parjolo manghaholongi hita. Nga rade Ibana gabe pelean parpadanan. Nunga rade
Ibana padamehon paralealeonta naung sega dohot Debata alani angka dosanta. Holongta
tu Jesus gabe bohal laho parsidohot dohot parjambar di HarajaonNa sogot. Amen.