){kind=link}
Mangolu Dibagasan Holong ni Debata Sitolusada
Damang dainang dohot angka dongan na hilaholongan! Ra hea do sungkunsungkun rohanta: “Ise do Debata na huhaporseai on? Songondia do rupaNa? Dao do Ibana sian ahu manang jonok do?” Dohot angka sungkunsungkun na asing. Sungkunsungkun na taronjar sian rohanta on, ndang sungkunsungkun na sala, alai gabe ringkot di haporseaonta. Sadarion tareahon do Ari Rea Debata Si Tolu Sada, ima Debata na tahaporseai: Ama, Anak dohot Tondi Porbadia. Barita Nauli sadarion patuduhon tu hita holong ni Debata na tung mansai balga. “Ai songon on do holong ni roha ni Debata di portibi on, pola do AnakNa na sasada i dilehon, asa unang mago ganup na porsea di Ibana, asa hangoluan na salelenglelengna di ibana.” (Joh. 3:16). Debata na tahaporseai ima Ibana na marholong ni roha na marsitutu.
Marhite panjahaon parjolo na nienet sian buku ni si Musa na paduahon, dipapatar do tu hita songondia Debata patuduhon DiriNa tu si Musa. Dipatanda Debata do DiriNa gabe sahalak Jahowa na talup jala na asi roha, lambat tarrimas, jala godang denggan basaNa dohot habonaronNa. Sian mulana, nunga dipatudu Debata ise DiriNa, ima Holong. Ndang Debata na jungkat, alai Debata na marasi roha jala Siparholong maradophon ruasNa.
Marhite panjahaon paduahon na nienet sian Surat Paduahon na tinongos ni Apostel Paulus tu halak Korint, dipatolhas do tu hita songondia holong na sian Debata i mangolu di tongatonga ni Huria i. “Sai didongani asi ni roha ni Tuhan Jesus Kristus dohot holong ni roha ni Debata dohot Parsaoran ni Tondi Porbadia ma hamu saluhutna”. Nunga lam tangkas tabereng ianggo Debata na mandongani hita i tarida marhite: Ama parholong, Anak Panobus, dohot Tondi Porbadia na pasadahon saluhutna. Debata ima padan holong na mangolu.
Marhite panjahaon paduahon na nienet sian Surat Paduahon na tinongos ni Apostel Paulus tu halak Korint, dipatolhas do tu hita songondia holong na sian Debata i mangolu di tongatonga ni Huria i. “Sai didongani asi ni roha ni Tuhan Jesus Kristus dohot holong ni roha ni Debata dohot Parsaoran ni Tondi Porbadia ma hamu saluhutna”. Nunga lam tangkas tabereng ianggo Debata na mandongani hita i tarida marhite: Ama parholong, Anak Panobus, dohot Tondi Porbadia na pasadahon saluhutna. Debata ima padan holong na mangolu.
Dibagasan Barita Nauli sadarion na sinurat ni si Johannes, didok do songon on: “Ai songon on do holong ni roha ni Debata di portibi on, pola do Anak na sasada i dilehon.” Nabadia Johannes ndang holan paboahon Debata na marholong ni roha, alai tong do dipatudu holong na mansai tangkas, marhite na dipelehon do Jesus Kristus, AnakNa gabe Sipanobus ganup jolma. Jala didok do, Debata manuru AnakNa i tu portibi on ndang gabe sipanguhum, alai na naeng paluahon.
Damang dainang dohot angka dongan sahaporseaon! Ninna roha tahe, nunga songon na boi antusanta hahomion ni Debata Jahowa na tasomba i. HolongNa i torus do dilehon tu hita. Ama parholong, Anak panobus, dohot Tondi Porbadia na mian rap dohot hita. Jadi, haporseaonta i ndang haporseaon na didasarhon tu “habiaron” alai haporsean na marsitutu maradophon holong ni Debata. Siala ni i, hita pe dijou asa mangolu dibagasan holong i. Molo Debata i holong, jadi hita pe ingkon mangolu do dibagasan holongNa i jala mangalehon holong i tu donganta jolma: dibagas keluarga, dibagas parkarejoan, jala tudia pe hita mangalangha. Dijou Debata do hita laho mangampini, paturehon dame, jala marsaor dohot sude jolma.
Damang dainang angka dongan sahaporseaon! Molo hita mambaen tanda silang, gabe tanda singotsingot ma i, hita mangolu dibagasan Goar ni Ama, dohot Anak, dohot Tondi Porbadia. Hita mangolu dibagasan asi ni Debata Sitolusada. Siala ni i, sai anggiat ma hita, ndang holan manghaporseai sambing, alai mangolu dibagasan holong ni Debata i ganup tingki. Debata Sitolusada i ma mandongani hita saluhutna. Amen