Di hita halak Kristen, Paskah ima impola manang unok ni haporseaonta. Marmula sian ari rea Natal (Hatutubu ni Sipalua) marimpola di ari rea Paska. “Alai anggo so dipahehe Kristus i, magopo ma haporseaonmuna, jala tong dope hamu di bagasan dosamuna” (1Kor. 15:17).
Di Ari rea Paska hita mangareahon Haheheon ni Jesus Kristus manaluhon hamatean alani i tagoari ma gabe “Ari Hamonangan” ni saluhut angka na porsea. Ari hamonangan on ndang na martudutudu tu hamonangan haportibion alai lumobi hamonangan partondion. Hamonangan dibagasan partondion patolhashon tu hita pigapiga ponggol pangarimangion, rupani:
1. Hamonangan maralohon hamatean
Di halak Kristen, ndang hamatean ujung ni saluhutna. Haheheon ni Jesus patuduhon naung talu hamatean i. On ma na mangalehon panghirimon tu hangoluan salelenglelengna sian apala hamatean pardagingon.
2. Hamonangan maralohon dosa
Ari rea Paska ima tingki naung marsirang hita sian ihotihot ni dosa. Di pangantusion ni haporseaonta, panghophopon ni Jesus di hau pinarsilang dohot haheheonNa ima songon sada dalan malua sian rante ni dosa na manghorhon hadabuan tu hajolmaon, jala dison ma dipaloas hajolmaon mardame dohot Debata.
3. Hamonangan maralohon haholomon
Ari rea Paska manggombarhon parbinsar ni hatiuron dung salpu haholomon.On patuduhon holong na marhamonangan dohot hadengganon maralohon hosom dohot hajahaton.
4. Hasasaut ni Bagabaga ni Debata
Ari rea Paska gabe sada tudutudu na tutu do Jesus i Mesias (Sipalua) na pinarbagabaga i. HaheheonNa i patoguhon sude pangajarionNa jala pataridahon na tutu do bagabaga haluaon ni Debata. Kristus naung hehe mamboan haluaon tu hajolmaon.
Paska haheheon marlapatan gabe ojahan ni sude haporseaon. Di pangajarion ni halak Kristen ari haheheon i gabe batu ojahan na togu di panghirimon ni parngoluan. Songon angka sisean na di mulana i mandele alai di ujungna gabe marlas ni roha, songon i ma nang angka halak na porsea na manaon angka parungkilon, asa rap “hehe” dohot Kristus na mangolu jala manaluhon hamatean. Dison ma hita marngolu na imbaru. Saluhut angka parange na maralo tu holong ni Tuhan ndang margogo maradophon holong ni Debata na so marna suda i. Rap Kristus hita hehe gabe “Jolma na Imbaru” na marsihol ni roha tu ngolu na dumenggan, na gok holong.
Habaranion ni angka sisean ni Jesus mangalo huaso hagolapon ni portibi dung hehe Ibana, songon i ma tong gabe tohonan tu hita. Ala nunga ditaluhon Jesus hamatean i, tahaporseai do ia hamatean pardagingon holan sada dalan do tu hangoluan na saleleng ni lelengna do i. Haporseaon on do na mambahen hita gabe sitindangi asa tongtong satia jala mangulahon na denggan nang pe di tongatonga ni rura partangisan ni ngolu di portibi on.
Manghatindanghon Kristus naung hehe ndang holan di gareja manang ulaon partondion sambing alai baliksa lam tarida ma i di ngolu siganup ari. Lapatanna haheheon i mamboan hamubaon ni ngolu saluhutna, ndang holan hata, alai dohot parange ima jolma na imbaru na patuduhon holong, las ni roha dohot dame, nang pe di dalan na rahis.
Halak kristen naung manghilala haheheon i gabe barani mangulahon na sintong nang sai hira na maralo tu hasomalan ni luhut naung jotjot mamintori manang aha pe na maralo tu panggora ni roha. Rupani marngolu na imbaru marhite parniulaan na tulus alai marpanganju di angka na hurang. Jala halak naung manghilala haheheon i tongtong mamboan panghirimon tu angka donganna tarlumobi di ngolu na gok pandelean. Halak na imbaru manghatindanghoni marhite na gabe siboan panghirimon. Lapatanna gabe siboan sulusulu na denggan, gabe “sira dohot panondang” ni portibi on.
Di haporseaonta, dibagabagahon Jesus naung hehe i do Tondi Parbadia songon pangurupi na mangalehon habaranion tu hita gabe sitindangi ni haheheonNa. On ma na mangalehon tu hita habaranion dohot panghirimon na manongtong sadarion rasirasa ujung ni tano on.
RP. Benny Manurung OFMCap
Posting Komentar