ARI REA ROHA NA SUNBADIA NI JESUS KRISTUS (Fr. Tommy Sinaga OFMCap.) - PARBARITA.com

 
Ro ma Hita Tu Jesus, Tongtong do Ungkap RohaNa Tu Hita

Damang dainang na hinaholongan! Di panjahaon parjolo sadarion, dipaingot si Musa do bangso Israel paboa na pinillit Debata nasida ndada ala na gumogo manang umbalga nasida sian angka bangso na asing. Dipillit Debata do nasida siala ni holong ni rohaNa. Ringkot do on tarimangi di ngolunta. Jotjot do dihilala jolma ingkon alani na burju do ibana asa dihaholongi Debata. Alai Hata sadarion patuduhon na jumolo do holong ni roha ni Debata maradophon jolma. Dihaholongi Debata do bangsoNa i, nang pe jotjot nasida madabu tu dalan na manimbil sian holongNa.

Di panjahaon paduahon, didok Nabadia Johannes do sada pandohan na ringkot: “Haholongon do Debata.” Lapatanna, saluhut ngolu nang pambahenan ni Debata tubu sian holong ni roha. Holong ni roha ni Debata tangkas situtu ma tarida dibagasan Jesus Kristus. Jesus ro ndada laho manguhumi saluhut jolma, alai laho paluahon do. Dijangkon Ibana do angka pardosa, diapuli do angka na marsitaonon, jala dilehon do hosaNa sandiri di hau pinorsilang i bahen haluaon tu saluhut jolma na porsea tu Ibana.

Di Barita Nauli sadarion muse, didok Jesus do: “Ro ma hamu tu Ahu, hamu angka na loja jala na sorat”. Mansai jonok do tona ni Hata on tu ngolunta siganup ari. Godang do jolma mamboan angka parungkilon dibagasan rohana. Adong do parungkilon ni keluarga, parungkilon ni parhepengon, parungkilon ni parsingkolaan, parungkilon ni ulaon, sahit, jala adong do biar ni roha taringot tu ari na naeng ro. Sipata hira na denggan do hita idaon sian duru, alai sasintongna loja situtu do rohanta.

Ndang dijanjihon Jesus ngolu ni halak na porsea malua sian parungkilon. Jala ndang didok Jesus pintor salpu sude parmaraan. Alai dijou Jesus do hita asa ro tu Ibana asa unang holan sahalakta mamorsan saluhutna angka parungkilon  i. Ungkap do roha ni Jesus tu angka na gale, na loja jala na porlu pangurupion. Jesus sandiri muse mandok na lambok jala serep do rohaNa. Jotjot do portibi on mangajarhon molo halak na gogo i ma halak na kasar, jala na sai mangharingkothon dirina sandiri. Alai asing do hagogoon na dipatuduhon Jesus. Hagogoon na sasintongna tarida do i di holong, hasabaron, dohot serep ni roha.

Sipata maol do hita ro mandapothon Debata ala tahilala nunga tung mansai mardosa manang nunga tung mansai dao hita sian Huria i. Adong do halak na marpingkir naung ditadinghon Debata nasida siala ni dosana. Alai Ari rea Roha na Sunbadia ni Jesus paingothon hita, ndang hea ditutup Debata pintu ni holongNa tu saluhut jolma na naeng mulak tu Ibana. Boha pe balga ni dosanta, tongtong do rade Roha ni Jesus manjanghon hita muse. Alana ndang umbalga dosanta sian holongNa. Alani i sasintongna joujou na gok panghirimon do Barita Nauli sadari on. Didok Jesus, “Ro ma hamu tu Ahu.” Unang mandao hita sian Debata molo maol ngolunta, alai lam tapajonok ma dirinta tu Ibana. Di tangiang, di Ekaristi, di panopotion, dohot di ngolunta siganupari, tongtong do dipaima Debata haroronta.

Sadarion Huria Katolik mangareahon Ari rea Roha na Sunbadia ni Jesus. Ari rea on tubu sian hasomalan ni Huria laho mangurupi jolma i lam mananda balga ni holong ni Kristus. Roha ni Jesus manggombarhon holong ni roha ni Debata na manghophop saluhut na jolma. Direahon Huria do on di ari Jumat dung salpu Ari Rea Pamatang dohot Mudar ni Kristus laho marningot holong ni roha ni Jesus na sun balga sahat tu na mate tarsilang. Sian Andora ni Jesus, diida Huria i do tanda holong dohot haluaon na torus mabaor jala mandurus tu portibi on.

Ari rea on pe mangarahon hita asa marsiajar serep marroha songon roha ni Jesus. Di portibi na gok hosom, pangareheion, dohot na so parduli dijou do hita gabe siboan holong. Mulai ma sian angka ulaon na metmet: manghatai na burju, marpamuati roha, mangurupi angka dongan na marhahurangan, pasangaphon natoras, jala unang paleahon dongan.

Alani i angka dongan sahaporseaon, tona ni Barita Nauli sadarion i ma: Debata do na parjolo manghaholongi hita. Tongtong do ungkap roha ni Jesus tu manang ise na naeng ro mandapothon Ibana. Alani i, unang mabiar hita pajonokhon diri tu Debata. Pasahat ma sude angka na dokdok dibagasan rohanta i tu Ibana, jala marsiajar ma hita mamboan holong ni Debata tu dongan. Sai anggiat ma diurupi Roha Nabadia ni Jesus hita gabe jolma parholong, na serep jala na satia tu Debata. Amen.