ARI MINGGU NASOMAL XIII (Fr. Vanlith Sinaga OFMCap.) - PARBARITA.com

 

Mangarahon Gogo Mangihuthon Jesus

Horas ma di hita saluhutna! Adong do sada umpasa ni halak hita mandok: “Jumpang na niluluan, jala dapot na jinalahan. Ai nunga ro be na niluluan, sai anggiat ma i gabe dongan sapanghilalaan”.

Angka dongan na hinaholongan! Panjahaon dohot Barita Nauli sadari on, paboahon jala mangarahon hita asa lam pahothon haporseaon tu Debata na sunhinagogo jala parhuaso ala Ibana do mula dohot ujung ni ngolunta.

Panjahaon parjolo paingothon hita tu sada boaboa, i ma, “Molo na denggan do na taulahon jala ias sian bagas rohanta maradophon parhalado ni Debata i, tontu do Debatanta i pe patuduhon dalan na uli lobi sian na taboto. Siala ni i, gabe jumpang ma na niluluan, jala dapot na jinalahan.

Dung i, Apostel Paulus di suratna tu halak Rom, paingothon hita tu sada sakramen naung tajalo i ma Sakramen Pandidion. Sakramen Pandidion do na parjolo tajalo asa gabe boi hita gabe sahalak Kristen, tarlumobi gabe sahalak Katolik. Jala i ma na gabe tanda hasesaan ni dosa jala ngolu naimbaru asa marsada hita dohot Tuhan i. Ojahan ni haporseaon on i ma hamamate ni Tuhan Jesus ingkon do talapati gabe “mate na laho pataluhon jala manesa dosa”, jala Ibana do muse “na mangolu sian hamatean ala ni gomos haporseaonNa tu Amanta Debata i” (mate manadinghon dosa, jala mangolu patuduhon haiason).

Dunghon i muse Barita Nauli di tingki on pe pahothon hita asa marsitutu hita mangarahon sude gogonta laho mangihuthon Tuhan i. Alana, molo naeng gabe sisean ni Jesus, ingkon rade do rohanta manadinghon ganup keluarganta (natuatuanta, dongan tubu, ripe manang angka ianakhonta), ingkon tolap do hita hamagoan ganup hosa ni ngolunta, jala ingkon rade do hita mangalehon saluhut ni ngolunta tu Jesus i. Alani Ibana do na mangalehon sude na adong dibagasan ngolunta siganup ari.

Marhite panjahaon dohot Barita Nauli na pinatolhas tu hita dibagas tingki on, ditogutogu ma hita tu sada boaboa i ma songon poda ni natuatua na mandok, “pantun do hangoluan, jala tois do hamagoan”.

Angka dongan na hinaholongan! Tuhan i pe mangarahon hita asa pantun mamparngoluhon angka tudutudu ni Tuhan i maradaphon ngolunta siganup ari ima asa unang sai lalap di arta portibi on, siala na laho salpu do i sude. Jala unang tois hita maradaphon donganta jolma na hurang ias dohot angka na gale. Alana marhite nasida do Tuhan i patudu dalan na tiur.

Angka dongan sahaporseaon! Habasaron dohot giot ni roha, tung i do na tongtong mangarahon hita tu sada ngolu na imbaru, jala i ma na gabe pahothon rohanta tu Kristus Tuhan i. Alana Ibana do na gabe mula ni holong na ias na so marna suda.

Sai anggiat ma marhite Barita Nauli sadari on gabe tarsunggul hita na laho mangurupi angka donganta na pogos asa parjambar hita di surgo nabadia raphon Tuhan Debatanta i. Amen.