Ari Rea Hatutubu ni Johannes Pandidi (Fr. Cresensius Marbun, OFMCap.) - PARBARITA.com

 

Gabe Halak na Porsea

Damang dainang dohot angka dongan na hinaholongan! Aha ma parbinotoanta taringot tu si Johannes Pandidi? Si Johannes Pandidi i ma sahalak panurirang na paradehon dalan manjanghon haroro ni Jesus. Si Johannes ndang mamora manang tarbarita alani huasona. Alai, ibana dipangke Debata do laho mangulahon ulaon na balga si tutu.

Dibagasan Barita Nauli sadarion, dituriturihon do hatutubu ni si Johannes Pandidi, anak ni si Elisabet dohot si Sakarias i. Marlas roha do angka hombar bagasna dohot sisolhotna umbege barita i. Ndang hinata tahe, ai molo marnida umur ni si Elisabet on, ndang na so jadi tubuan posoposo be nasida. Ra, aut sura halak Batak si Elisabet on nunga gabe sihataon ni na torop jala didok na so gabean. Sude do mangarajumi partubuna i gabe sada halongangan jala tanda holong ni roha ni Debata.

Dung dapot tingkina mambahen goar ni dakdanak i, naeng ma dibahen Halak i goarna si Sakarias, hombar tu goar ni amana. Alai digogohon si Elisabet do asa si Johannes goar ni posoposo i. Longang situtu angka na torop, ai so adong agia ise na margoar songon i sisolhot ni nasida. Alai anggo si Sakarias, disurathon ibana do di sada panuratan na ingkon si Johannes do goar ni posoposo i. Pintor mungkap ma pamanganna gabe boi ma ibana manghatai. Longang ma sude halak jala tubu sungkunsungkun di tongatonganasida, “Gabe aha ma ulaning dakdanak on?” Tangkas diida simalolongnasida didongani tangan ni Tuhan do ibana. Ngoluna gabe pelean tu Debata. Ibana gabe sahalak na paradehon dalan tu haroro ni Sipalua. Dibaritahon do hamubaon n iroha asa angka na torop pe paradehon diri na. Ndang gogo na dipangasahonnasida. Gariada tahe ninna ibana do, “Ianggo Ibana, patut lam ganda; lam moru ma anggo ahu!”

Damang dainang dohot angka dongan na hinaholongan! Sian si Johannes Pandidi, boi do hita marsiajar, ngolu on ndang holan mangalului pujian manang gabe halak na tarbarita. Marhite ngolu ni si Elisabet nang si Sakarias pe, boi do tatiru songondia do rumang ni halak na porsea tu Debata. Aut sura ndang porsea nasida nadua, nda tung tubu si Johannes Pandidi on marhite si Elisabet. Alai ala porsea do si Elisabet, saut ma Hata ni Debata i di ibana. 

Ngolu ni si Johannes pe boi do gabe tiruan di hita. Dipatuduhon si Johannes do serep ni roha dohot habaranion laho mangulahon hasintongan i. Diajari si Johannes do hita asa mangulahon angka na rumingkot di ngolunta Rupani mangurupi angka donganta jala gabe tanda holong ni Debata tu angka jolma na torop. Sai huingot do sada pandohan na tarsurat di Biara Novisiat Kapusin Parapat. Disurathon do di sada hau songon on (marhata Indonesia) “Tuhan memilih orang biasa untuk melakukan hal-hal luar biasa.” Ra tangkas do taboto aha lapatan ni hata i. Sai anggiat ma marhite Ari Rea Hatutubu ni si Johannes Pandidi on lam tamba ma haporseaonta. Amen.