ARI REA APOSTEL PETRUS & PAULUS (Fr. Marojahan Simamora OFMCap.) - PARBARITA.com

 

Panjouon Gabe Sitindangi ni Kristus

             

            Damang dainang angka dongan na hinaholongan! Ra sisean ni Jesus na tareahon sadari on ndang asing be di sipareonta. Ganup taon do tareahon nasida nadua rap.

            Angka dongan na hinaholongan! Ala nunga dapot tingkina, sae nama ulaon ni Jesus di portibi on, dihobasi Ibana ma sude siseanNa asa mangihuthon Ibana gabe sitindangi. Andorang i, disungkun Jesus do angka siseanNa i sungkusungkun taringot panandaion tu diriNa. Panandaion jala pangantusion ni torop jolma rupani i ndang apala bagas do pe. Ditanda nasida do Jesus songon hadirion ni Johanes Pandidi, Elia dohot panurirang na asing.

Dung i disungkun Jesus  ma tu sisesanna sandiri, apostel na sampulu dua i: “Ia Hamu! ise do ahu, didok hamu?” Jadi ninna si Simon Petrus ma: “Kristus (Messias), Raja na pinarbagabaga i do Ho, Anak ni Debata na mangolu”. Dung i ninna Jesus ma mangalusi ibana: “Martua ma ho, Simon, anak ni si Jona, ai ndada daging dohot mudar papatarhon i tu ho, Damang na di banua ginjang i do. Ahu pe, hudok ma tu ho: ‘Si Petrus (Batu mamak) do ho, jala di atas batu mamak ondeng do paojahonHu HuriangHu, jala na so tupa talu i bahenon ni angka harbangan ni banua toru”.

Damang dainang na hinaholongan! Nabadia Petrus dohot Paulus, i ma dua halak nabadia na balga jala sumurung Hurianta.  Denggan do taboto siala Petrus sisean ni Jesus jotjot do madabu ibana tu pangujunan na padaohon dirina sian Jesus. Apostel Paulus pe, ibana ima sahalak na hea marsogo ni roha tu angka pangihut na porsea tu Jesus. Alai sudena i gabe sada dalan hamubaon do i dibagas diri ni si Paulus.

Mula ni partinandaan ni Petrus dohot Paulus tu Jesus i ma panandaion na marbanghohon holong na marparbue dibagas tondi na marhobarhobar laho mamaritahon Barita Nauli i jala gabe sitindangi ni Kristus. Diboto nasida do siala godang  do abatabat dohot parungkilon na laho sitaonon ni nasida laho mamaritahon Barita Nauli i. Partinandaan dohot panopoton tarsingot tu dua sisean i do tong na gabe panandaion ni dirinta tu Jesus. Ingkon ma nian panandaion na marbangkohon holong na tahilala dohot Jesus, ndang sae holan panandaion marhitehon parbinotoan sambing. Mura do hita  mandonghon jala manghatindanghon haporseaon siala Jesus do Tuhan na marhuaso, alai toho do hita mangalehon jala mangarahon hadirionta tu Ibana manang holan hagogoon ni dirinta sandiri do na taanggarhon?

Panopotion ni si Petrus pataridahon mula dohot habadian ni Debata. Habonaran dohot pos ni roha i do na mambahen Jesus pajongjonghon huriaNa, i ma sada hatopan na porsea tu Ibana. Tu si Petrus do dilehon Jesus  hunsi harajaon ni Debata di portibi on, i ma huaso laho patoranghon uhum Kristus na mangungkap dalan tu jolma asa marhaporseaon jala asa bongot marhitehon parhorason.

Damang dohot dainang! Ngolu ni si Petrus dohot Paulus gabe dalan sitiruon asa mangunsande dirinta tu Tuhan laos barani mangalehon panindangion taringot  Ibana dohot paimahon haroroanNa muse. Amen.