TARSINGOTNA MA JOLO, FRATER - PARBARITA.com

 

Ise Do Fransiskus Assisi?

Horas Frater! Bahen hamu ma jo panorangion dohot panandaion taringot tu nabadia Fransiskus Assisi. Songon na sar do goarna di masa si nuaeng on. Sian Nai Tangkas, Stasi Bah Kapul.

Horas Inang! Mauliate ala nunga rade hamu marpanungkun taringot i. Tanda ma hamu na tangi jala tinggil marnida aha na masa di hurianta nuaeng. Ise do Fransiskus Assisi? Ibana i ma sahalak nabadia na tubu jala balga di Assisi, Italia. Tubu taon 1180/1181, monding di taon 1226 jala dikanonisasi gabe sahalak nabadia di taon 1228. Tung mansai sar do goar ni nabadia on. Digoari do ibana gabe panggomgom hasiangan, pangholong manang panghophop na gale dohot na pogos jala mangalehon diri gabe sisolhot tu sude jolma dohot sude angka namanggulmit. Porlu do muse taboto, ia si Fransiskus on gabe tung tarbarita ala hea do ibana dapotan stigmata, angka tanda ni bugang ni Kristus na hona pangku jala hujur di hau pinorsilang. I gabe tanda siala tung mansai jonok ibana tu Kristus. Partangiang na utusan do ibana.

Taon on di hurianta, di goari do gabe Taon Yubileum St. Fransiskus, taon na laho manaringoti hamamatena 800 taon na salpu (1226). Di taon on, godang do dipatupa huria angka ulaon na hombar tusi. Marhitehon i, ditogihon do hita asa marguru tu si Fransiskus na naung patuduhon parngoluan na hombar tu ni halomohon ni Debata. Sai anggiat ma gabe lam holong hita tu donganta tarlumobi di na marhahurangan jala lam renta hita di na paturehon portibi dohot sude pangisina.

Taon on, boi ma hita mangido pangurupion tu Fransiskus asa tolap hita mandalani ngolu di portibi on. Taungkap ma devosinta sudung tu ibana.Tapangido do pangurupion tu ibana asa ditangianghon hita tu Debata. Parsidohot ma hita di sude ulaon rupani songon ulaonulaon sakramental, ulaon ekologis ziarah, seminar dohot angka lan na asing. Asa gok dappotan pasupasu hita. Mauliate!