PANUNGGULION
Turtu ninna anduhur, tio ninna lote.
Molo tapangke AI bahen hamajuon, sai hot ma parbinotoan jala horas hita sude.
Horas
ma di hita saluhutna!
Asi
ni roha dohot dame na sian Debata Ama dohot sian Tuhanta Jesus Kristus nang
Tondi Porbadia i ma mandongani hamu damang dainang raphon angka dongan situan
panjaha na hinaholongan.
Situan
Panjaha na hinaholongan jala na hinormatan! Di masa saonari on, tangkas do
taboto jala tahilala do, boha panghorhon ni hamajuon ni teknologi manang
sitalpas halinu tu dirinta ganup marsadasada nang pe tu ngolu hamasarakatonta dohot
parsaoranta. Nunga muba be gulmit ni parngoluonta alani haroro ni sitalpas halinu
on. Tarlumobi ma na tagoari jala tatanda nuaeng Artificial Intelligence (AI)
i ma “habisuhon jamajama manang jadijadian” Diurupi do hita mangulahon ulaonta
siganup ari; ai sipaniru jolma na tung mansai suman do anggo AI on. Alai boi do
tong gabe sipanegai bangko dohot parange ni jolma molo ndang bisuk jolma mangalapati
i.
Angka
situan panjaha saluhutna! Di Edisi Juli-Agustus 2026 on, diparade Parbarita do
pangarimangion nang parsiajaran taringot AI marhitehon Ensiklik Magnifica
Humanitas (Hajolmaon na tung mansai timbul) na hinaruarhon ni Amanta Paus
Leo XIV. Diondolhon do pangarimangion i marhitehon Sijaringkot dohot siguriton
na asing. Songon na somal, diparade Parbarita do tong Bilut Jamita, ragam ni
ulaon, dohot katekese na jempek. Anggiat ma, marhite pangajarion sian Ensiklik
i lam marbisuk hita mangadopi hamajuan ni teknologi manang AI on. Lam
tatanda dirinta tumiru rupa ni Debata; jala tau hita siala na tumimbo do hita
sian AI, jadijadian i.
Mauliate
ma di hita saluhutna,
Horas!
Redaksi