SIJARINGKOT - PARBARITA.com

 

Nunga tung mansai jotjot tahe tarsar Huta Parsoburan tu luat na asing. Sipata tarsar ala panghataion na tung mansai andul sian na asing, sai hira adong ende ni hata i. Sipata tarbarita alani roa ni dalan tu huta i. Jotjotan tarsar ala jogi ni huta i do nian. Alai anggo sahali on tung mansai andul do. Boasa? Tapaihutihut ma sarita on.

Dung gabe sada paroki huria di Parsoburan, angka pastor Projo ma na gabe parmahan ni Huria. Godang ni stasi pe tung mansai torop do, hirahira duapulu pitu godangna. Adong ma sada stasi na tung mansai dao sian paroki. Goar ni stasi on tung mansai geok begoon di sipareon. Stasi Sibodat do goar na. Ndang apala tangkas diboto boasa tung apalai goarna. Ra, ala godang ni bodat do ra di huta i. Ra!

Di sada tingki, topet na di ari Minggu, ro do Pastor Bornok tu stasi i. Rap do dohot pastor i sahalak katekis, si Jaringkot goarnasida. Halak Batak do ianggo si Jaringkot on, alai nunga leleng marhuta di kota Medan. Ndang pola tulen be marhata Batak. Molo saonari didok ma i “Batak dalle”. Jumpa ma tingki tingting, ninna amanta porhanger ma songonon, “Ta begema tingting di stasinta on, stasi Sibodat.” Holan i dope didok, nunga mengkel si Jaringkot. Disungkun ibana sahalak ama na di sampingna. “Ah, da margaitgait do amanta porhanger i, tahe?” Diantusi amanta i do lapatan ni sungkunsungkun ni si Jaringkot. Ninna nasida nanget, “Ndang margaitgait i, Amang. Ai i do goar ni stasi on.” Tarhatotong si Jaringkot umbegesa.

Dung salpu tingting, jongjong ma Pastor Bornok manggohi tingting ni porhanger i. Ninna ma mamungka hatana, “Horas damang dohot dainang. Las rohangku marnida renta ni roha mu na laho paihutihut ulaon misa nabadia on. Hupaihutihut do tong pardalan ni huria di stasi on. Gok hamajuon, gok si las ni roha.” Mengkel suping sude ruas umbege hata ni pastor i. Diuduti pastor i muse hatana, “Alai, ninna rohangku, ta ganti ma goar ni stasinta on. Geok begeon, maol dohonon. Ingkon marpesta do hita laho mangganti i. Dison ro do katekis sian paroki. Tu jolo ma hamu, Amang. Bahen hamu ma saotik hatorangan taringot tu goar ni stasi on. Laos pillit ma atik aha do goar na bahenon.”

Lam tamba songgot roha ni si Jaringkot. So adong dihatai pastor taringot on di paroki. Aha ma dohononhu? Aha ma bahenon goarna? Tompu ma diingot ibana sada nabadia, jala pas do dihilala gabe goar ni stasi on. Tu jolo ma ibana. Songon na somal, dipalehet ibana do hohosna. Dipungka ibana ma hatana songonon, “Damang dainang na hinaholongan! Las roha ni amanta pastor, umlas dope rohanghu di ombason. Tutu do tahe na didok ni amanta pastor i, tung mansai renta roha ni ruas di stasi on. Alai naipe, songgot rohangku umbege goar ni stasi on. Hurimpu do margaitgait amanta porhanger mandok i. Tutu tahe, geok begeon, maol dohonon. Ninna rohangku, tung uli do molo goar ni stasion saguru tu nabadia na gabe panjaga na. Boha hirahira molo goarni stasi on, stasi Fransiskus Assisi, Laverna? Boasa ingkon Fransiskus ndang Johannes?” Disungkun ibana angka ruas.

Dialusi amanta porhanger ma sungkunsungkun i dohot gaitgait, “Patorang ma, Amang!” Mengkel angka ruas umbegesa. Diuduti si Jaringkot hatoranganna, “Molo ta bereng huta on, tung mansai uli. Gok angka suansuanan, godang angka parbue ni hau, torop ni angka binatang masiboan massam na. Lapatanna, tung mansai uli do huta on jala dao dope sian angka parjahat na olo manegai. Ia si Fransiskus, sahalak nabadia na dipillit Huria gabe panjaga ni angka na tinompa. Dihata Indonesia jotjot didok Pelindung lingkungan hidup. Manang boi ta dok dongan ni sude na tinompa; manisia, binatang dohot angka suansuanan. Da holan i tahe, jonok do si Fransiskus on tu halak na metmet, napogos, dohot angka na gale. Topet muse taonon tareahon do Taon Jubileum Fransiskus, 800 taon marningot hamamate ni si Fransiskus” Olat ni i dope hatorangannasida, nunga martopap tangan sude ruas. Ninna sahalak inanta pangula huria, “Satolop ma hami, Amang dihatorangan mu na i. Uli begeon ni sipareon, suman hatahononton.” Lam ribur do soara ni ruas umbegesa. Las roha ni si Jaringkot huhut naeng manetek iluna.

Mulai sian i, nunga marganti be goar ni stasi i. Dipatupa do sada misa laho mangganti goar i. Pola tahe dipatupa sada pahanpahanan ala las roha ni ruas i. Ninna angka natorop, da holan goar ni stasi i na marganti. Ra dohot do tong goar ni huta i margoar Laverna. Toho manang ndang barita i, na umringkot i ma, giot ni ruas i laho pangoluhon huria dohot hutanasida.