SAI NA ADONG DO ("ANGKA AMANGAMANGHU DOHOT INANGINANGHU!") - PARBARITA.com

 

Somal do tahe dipatupa libur tu angka frater kapusin di bulan sampulu dua. Angka naung tingkat dua dohot tingkat opat, boi mulak tu jabu ni natorasna. Alai molo angka frater na sian Kalimantan, ala parhuta na dao do nasida, boi do nasida libur tu jabu ni dongannasida sama frater di luatta on. Boi do tong tu sada paroki na nihobasan ni angka pastor kapusin. Frater Mayu sahalak sian Kalimantan dipillit ibana ma marlibur tu paroki Pangururan, naeng mida haulion ni Tao Toba i do ianggo sangkap ni rohana.

            Jumpang ma tingkina. Libur ma angka frater. Ndada holan sahalak ni Frater Mayu na marlibur tu Pangururan. Ditogihon ibana do angka donganna na asing, lumobi ma na sian Kalimantan. Hirahira dua minggu do nasida disi. Taringot tu ulaonnasida, angka pastor na disi ma mangaturhonsa.

Di sada tingki, diboan pastor ma Frater Mayu tu sada stasi. Nian pangket dope anggo hata Batak di huta on. Las roha ni ruas i ala ro pastor dohot frater. Pintor boi do diboto nasida na so halak Batak Frater Mayu on alani bontarna. Dung sidung Missa, disuru pastor ma frater on patandahon dirina. Ndang pola parila Frater Mayu. Pos do rohana ai nunga marsiajar ibana patandahon diri di hata Batak sian angka frater na asing. Ninna ibana ma patandahon dirina, “Horas di hita saluhutna!” Dialusi ruas i hatop, “Horas, Frater!” Diuduti frater on ma muse mandok hatana. “Amangamanghu dohot inanginanghu, hupatandahon ma goarhu Frater Mayu sian Kalimantan.” Margakargak sude ruas i umbegesa. Dirimpu frater on ala ni jago na manghatai. “Jadi angka amangamanghu dohot inanginanghu, ahu maringanan di Siantar.” Ninna ibana muse. Lam mengkel angka jolma i, dohot do tong pastor i mengkel. Ninna sahalak ama nanget, “Ehe tahe, nunga dohot be parnijabunghu gabe inanginang ni frater on.” Sai na adong do. Hehehe!