Ari
Minggu Nasomal XXVI
Hes.
18:25-28; Ps. 25:4-5.6-7.8-9; Plp. 2:1-11(1-5); Mat. 21:28-32
Fr.
Anju Situmorang, OFMCap.
Mangoloi jala Mangulahon
Horas
ma angka damang dainang dohot angka dongan na hinaholongan! Di ari Minggu
nasomal XXVI on, rap ma hita mangarimangi hata ini Tuhan marhite angka
panjahaon sadari on. Dibagasan barita nauli dipatolhas Tuhanta Jesus do sada
tudostudos tarsingot tu hasomalanta jala laos gabe hagaleonta. Adong ma sada
ama dohot dua gellengna. Dijujui sahalak amaama ma gellengna sihahaan laho
mangula tu porlak anggurnasida. Dijua ibana do nian hata ini amangna i, alai
manolsoli do rohana, jala laos laho do ibana mangulahon hata ni amangna i. Dung
i, ditopot amaama i ma sianggian laos songon tu sihahaan i do hatana. Hatop do
dioloi sianggian. Alai ndang songon hahana, ndang saut ibana laho tu porlak.
Dipatudu
Jesus dua alus na mansai tangkas maralo. Ndang holan alus na maralo, parniulaan
ni nasida pe, tong do maralo. Ia sihahaan i, dijua do tona ni amangna i, alai
saut do diulahon ibana. Siampudan i, diundukhon ibana do hata ni amangna, alai
ndang saut diula ibana.
Songon
siampudan on ma jotjotan ngolunta siganup ari, lumobi ma di ruma tangga. Jotjot
do ra diundukhon angka gellengta angka poda ni natuatuana. Umpamana, andorang
so tu porlak natuatuana, ditonahon do asa dipaias jabu. Alai, sahat tu na mulak
natuatuana sian porlak, ndang dipaias jabu i. Bah tahe, tutu ma molo sai ribut
angka inanta di jabu. Ndang holan anka dakdanak tahe, angka ama dohot ina pe
jotjot do sisongoni. Lalap di parlalapan. Tudos-tudos na pinasahat ni Tuhan i
pe tung mansai hona do tu ngolu hakristenon. Jotjot taolohon hata ni Tuhan,
alai sada pe ndang taulahon.
Dibagasan
Barita Nauli dipatangkas Jesus ma muse, tudos do sihahaan on songon sijalobeo
dohot boru na jahat. Sianggian on tudos ma tu sibotosurat jala angka halak
Parise. Diboto sibotosurat dohot Parise do angka hata ni Tuhan, alai ndang
diulahon nasida tudos tu parbinotoanna i. Alai anggo sijalobeo dohot borua na
jahat, ndang ditanda nasida hata ni Tuhan, ulaon na so suman do diula nasida
dingoluna, alai dungkon dibege nasida hata ni Tuhan, marhamubaon ni roha nasida
jala laos mangulahon hata ini Tuhan di ngoluna. Gabe tagonan do sijalobeo dohot
boru na jahat benget tu Harajaon ni Debata unang sibotosurat dohot Parise.
Damang
dainang dohot angka dongan na hinaholongan! Marhite hata ni Jesus sadarion, sai
anggiat ma nian gabe jolma na mangaoloi hata ni Tuhan hita, jala laos taulahon
hataNa i. Marhite pandidion naung tajalo, nga ta tanda Debata jala taboto
hataNa. Taulahon ma nian dibagas ngolunta siganup ari. Unang ta jalo pandidion
i, ta jalo muse daging dohot mudarNa marhite misa nabadia, dohot angka sakramen
na asing, alai parniulaonta ndang sadalan tu roha ni Tuhan i. Asa unang gabe
songon sahalak jolma na dipatolhas di panjahaon na parjolo: nga tajalo
nadenggan, alai gabe mate hita ala pangalahonta na so suman. Molo tung pe nga
mardosa hita, taingot ma hata ni Panurirang Hezekiel, “Alai parjahat i pe, molo
tung ditundalhon hajahaton na niulana na sai laon, jala diulahon uhum dohot
hatigoran: Pangoluhon tondina ma ibana disi.”
Siala
ni i, aha do na boi ta ulahon gabe sahalak Kristen? Dipatolhas Apostel Paulus
do dibagasan suratna tu huria Pilippi, didok: “Sada ma parrohahon hamu; sada ma
haholonganmuna; saroha, sapingkiran ma hamu! Unang ma mardingkandingkan manang
marhasangapon na rumar; alai sian toruk ni rohamuna be ma rajumi hamu
donganmuna sumurung sian dirimuna! Unang ma na ringkot di hamu be matahon hamu,
dohot ma na di dongan! Songon parrohaon ni Kristus Jesus ma parrohaonmuna!”
Sai
anggiat ma sadalan nian hata dohot parniulaonta, sadalan na taundukhon dohot na
taulahon, asa tajalo haluaon jala dapot ta hangoluan na ma manontong i. Amen.