ARI MINGGU BIASA XVIII
Jes. 55:1-3; Flp 8: 35;37-39; Mat 14:13-21
Fr. Winston Efrim Situmorang
Debata Nampuna Lobi sian na Tuk di Hita
Angka
dongan sahaporseaon dibagasan Kristus! Adong
do sada partingkion di ngolu on naung ditaon sude halak, i ma sada di tingki
taida haporluan di jolo ni simalolongta huhut taida na adong di tanganta, jala
tadok tu dirinta sandiri, “Ndang tuk be on.” Lima roti dohot dua dengke tu lima
ribu halak? Ra dohononta do songon na nidok ni angka sisean i: “Suru ma nasida
mangalului sipanganon.” Alai di tingki on, dijou Tuhan i do hita marnida dalan
na asing. Ndang marhite simalolong na mangetong na hurang alai marhite simalolong
ni haporseaon, na porsea di ulaon ni Debata. Otik do na boi gabe lobi sian na
tuk.
Angka
dongan na hinaholongan! Dibagasan Buku Panurirang ni Jesaya, dijou di hita
marhite joujou na mansai las jala na mambahen longang roha: “Hamu sude angka na
mauas, ro ma hamu minum aek. Hamu angka na so marhepeng, ro ma hamu mambuat eme
na so pola situhoron, jala mangan ma hamu.” Tung mansai denggan do soara ni gonghon
joujou on. Molo taida portibi on saonari on, sai adong do na dipangido portibi
on: parbinotoan, haboion, prestasi, manang hepeng. Alai didok Debata do:
ro ma ho marhite angka panghilalaonmu. Ro ma ho dohot tangan na ias. Ro ma ho
mardongan roha na loja jala na maheu. Dung i disungkun Debata ma lambok alai
tajom: “Boasa ulaonmuna tu na so pasonanghon rohamuna?” Sungkunsungkun na
mansai ringkot do on di hita nuaeng on. Jotjot do hita mangalehon gogo, tingki
dohot panghirimonta tu angka na ujungna ndang hea tutu pasonangkon
rohanta. Marsitutu do hita laho mandapothonsa
jala ujungna, adong dope haleon na mian di hita. Ndang alani i Debata manguhumi
hita. Gariada tahe, dijou Ibana do hita asa marhusor jala ro tu mual na
sintong: “Tangihon hamu ma Ahu, pangan hamu ma na tabo, jala marlas ni roha ma
tondimuna.” Las ni roha na tutu na so boi tatuhor manang dapot sian gogonta
sandiri. Silehonlehon do i jala sadarion dipasahat Debata do i sian ungkap ni
tanganNa.
Barita
Nauli sadarion mamboan hita tu topi ni tao Galilea. Dung dibege Jesus barita na
mambahen hansit roha, i ma si Johannes Pandidi, hahaanggina, na diponggol simanjujungna.
Dung i surut ma ibana tu inganan na hohom di bagasan parau. Alai ndang diloas
natorop i ibana. Diihuthon nasida ma ibana mardalan pat humaliang tao i. Jala
dung turun Jesus sian parahu i, ndang dipangido ibana inganan na dihaporluhon
ibana, alai disurathon do di Barita Nauli i: “Asi do rohana mida nasida,
dipamalum ma angka na marsahit di nasida.” Jesus sandiri nang pe marsak, alai
asi ni rohaNa tu dongan jolma ndang hea mintop ala ni arsak ni rohaNa sandiri.
On ma holong na sintong, ndang holong na holan tarida di tingki denggan
pangkilalaanta, alai holong na torus marbaor nang pe di tongatonga ni hansit ni
rohanta sandiri. Dung jonok botari, gabe ndang sonang be pangkilalaan ni angka
sisean i. Dipaboa nasida do aha na masa i marhite pingkiran ni hajolmaon:
inganan na dao, nunga borngin, hurang sipanganon, tumagon ma dipaulak angka
jolma on. I ma dalan na piningkirhon ni angka siseanna. Alai didok Jesus ma,
“Ndang pola laho nasida, lehon hamu ma nasida mangan.” Tarsonggot ma angka
sisean i. Dialusi nasida ma, “Holan lima roti dohot dua dengke do na adong di
hami.” Parrohahon ma hata “holan” di alus ni angka sisean i. Tarida ma disi
roha na marnida hahurangan. On ma roha na mambahen bolat tu Debata marhite
hajolmaon. Ndang marsoal Jesus. Holan didok ibana do, “Boan ma i tuson.” On ma
na naeng didok Jesus tu hita i ma “boan ma manang aha pe na adong di ho, nang
pe otik, jala lehon ma i tu tanganKu”. Dibuat Jesus ma roti na lima i dohot
dengke na dua i, dibereng ma tu ginjang, didok ma pasupasu, diponggoli ma roti
i, dilehon ma tu angka siseanna, dung i diparlehon ma tu natorop i. Lima ribu
baoa, ndang dietong borua dohot dakdanak, mangan jala bosur. Jala adong dope
sampulu dua karanjang na lobi.
Angka
dongan sahaporseaon dibagasan Kristus! Di Panjahaon Paduahon, dipahot si Paulus
do hita marhite sada haporseaon na tubu sian angka na tahilala di ngoluna
sandiri: “Ise ma na boi manirang hita sian holong ni roha ni Kristus?
Haporsuhon, hasusaan, pangaleleon, haleon, haholomon, parmaraan manang podang?”
Taparrohahon ma, ditaringoti si Paulus do haleon. Diboto ibana do lapatan ni na
so tuk. Nunga dihilala ibana hahurangan na sasintongna. Hape, sian panghilalaon
na i, boi do ibana mandok dohot pos ni roha na gok: “Gumodang do hita di
saluhutna i, marhitehite Ibana na manghaholongi hita.”
Holong
ni Kristus i ndang bagabaga na sai tongtong paluahon ngolunta jala sude
haporluanta dipasaut marhite tanda halongangan di ganup tingki. Alai gabe sitiopon
do i, di sude angka sitaonon, di na godang manang di hapogoson, di las ni roha
manang di arsak ni roha, di hagogoon manang di hagaleon ndang hea hita
dipasombu.
Jala
dipaujung si Paulus do marhite pandohan na so hatudosan: “Nang hamatean, manang
hangoluan, nang angka surusuruan, manang angka panggomgomi, nang angka na masa
nuaeng, nang angka na naeng ro, nang angka hagogoon, nang haginjangon, nang
bagas, manang aha pe di nasa na tinompa i, ndang tarbahensa manirang hita sian
holong ni roha ni Debata, na di bagasan Kristus Jesus Tuhanta i.” Holong ni
Debata ndang marsyarat, dang holong na holan ro molo dung talup hita, molo dung
tuk gogonta, molo songon na denggan do pardalanan ni ngolunta. Alai tahilala do
i marhite ganup gulmit ni parngoluonta ro di saleleng ni lelengna.
Hamu
angka dongan! tolu panjahaon sadarion marsada do dibagasan sada barita na
marhuaso: Ndang hea dipasombu Debata hita hurang di na ringkot situtu. Ra,
adong do sian hita nuaeng on na mangadopi hahurangan situtu, i ma parhepengon,
parkarejoan na so totu, haporluan ni keluarga na na so tatarpatupa. Songon
angka sisean na holan lima roti dohot dua dengke, taida ma bilanganna jala
tadok ma: ndang sae on.
Joujou
sadarion i ma: boan ma na adong di ho tu Jesus. Unang paimahon asa dihilala ho
tuk gogonta laho mandapothon Ibana. Ro ma ho nuaeng. Lehon ma i tu Ibana jala
pos ma roham di Ibana laho pasaehon i. Ra, adong dope na asing na hurang ndang
ala ni materi alai ala ni gogo ni roha. Haporseaon na mulai marhusor. Tu hita,
didok si Jesaya do: “Ro ma hamu minum”. Ro ma ho tu mual na so hea marsik i. Ro
ma ho tu Debata na umbagas mananda ho sian dirim sandiri. Jala tu hita na
manungkun parduli dope Debata, ro dope Ibana di tongatonga ni hagaoron ni
ngolungku? Diialusi si Paulus do i dohot hata na denggan: olo, parduli do
Ibana. Olo, ro do Ibana. Jala ndang adong huaso na di banua ginjang dohot na di
tano on na boi mangaripashon hita sian holong ni rohaNa. Amen