ARI MINGGU NASOMAL XVII
1 Raj 3: 5. 7- 12; Psal.119: 57.
72.76-77.127-128,129-130; Rom.8:28-30; Mat.13:44-52
Fr. Rio Siadari
Arta na Ummarga
Angka dongan na
nihaholongan dibagasan Jesus Kristus! Marhite Barita Nauli sadarion, dipaboa
Jesus do barita ni sahalak na jumpangsa arta na buni dohot angka partigatiga na
mangalului hamoraon manang arta na so boi tartuhor dohot hepeng.
Dung dapot
nasida arta na so tartuhor on, olo do nasida manggadis sude na adong di nasida
laho manuhor arta na arga i. Diulahon nasida do i sian las ni roha, ndang sian jut
ni roha.
Di ngolunta
siganup ari, jotjot do hita holan mangeahi angka ulaon asa dapotta hamoraon
sian portibi on. Marsitutu do hita karejo asa mandapot hepeng, asa adong jabunta,
asa sangap hita di jolo ni na torop, manang asa dipuji halak hita. Tontu, ndang
adong na sala di angka sintasinta manang ulaon i. Alai, sipata lupa do hita
manungkun dirinta: “Boi do saluhutna i mamboan hadameon ni roha na tutu?”
Marhite Barita Nauli
sadarion dipasingot Jesus do hita taringot “arta” na dao rumingkot sian
saluhutna i, i ma Harajaon Banua Ginjang. Lapatanna, mangolu jonok tu Debata,
marroha na dame, jala gok holong. Molo dung tahilala hinauli ni ngolu na jonok
tu Debata, ndang be angka na di portibi on na rumingkot di hita. Mangihuthon
Jesus ingkon adong do pelean ni diri manang na tatean gabe tanda ni holong.
Dijou do hita asa “manggadis” manang manadingkon parangenta na so tama. Boi
muse ma tapatarida, marhite na manadingkon roha na marholong ni roha tu dirinta
sandiri, sogo ni roha, borat ni roha laho martangiang, manang hasomalan manghatai
jolma. Ra, maol do i mulana manadingkon i sude. Alai holan i do dalan laho
mandapot hasonangan na sasintongna sian Debata.
Di ujung ni
panjahaon i, dipaingot Jesus do sogot di ajal ni hasiangan on: na manangkap
ragam ni dengke. Di pudian ni ari, disimpan ma dengke na denggan jala
dibolongkon ma dengke na roa. On ma sada sipaingot di hita saluhutna. Ngolu di
portibi on, i ma sada tingki laho mamillit. Tagohi do ariarinta dohot angka na
denggan, manang tapaloas do dirinta digohi angka hajahaton?
Rap
mangarimangi ma hita di Minggu on. Aha do na jotjot taulahon di ngolunta? Nunga
talehon tingki laho mangalului Debata, Arta na Sintong i? Anggiat ma lam barani
hita manadinghon angka na hurang dihalomohon rohanta laho dapotan ngolu na lam
jonok tu Ibana. Amen.