ARI
MINGGU NASOMAL XIX
1 Raj. 19a,11-13a; Psalm. 85:9ab-10,11-12,13-14;
Rm. 9:1-5; Mat. 14:22-33
Fr.
Yohannes Daniel Sinaga, OFMCap
Gomos
Marhaporseaon tu Debata
Di
sada borngin na holom di tonga ni tao, di parau na metmet do anggo angka sisean
ni Jesus. Gogo do alogo, lam timbo do galumbang, jala marhusorhusor do solu
nasida so marhasoan. Borngin i ndang holan halisungsung di laut na ro manopot
angka sisean i, halisungsung pe. Tung mansai mabiar do angka sisean.
Tompu
ma diida nasida sada halak manjonok tu nasida, jala mardalan do Ibana di
ginjang ni aek tao i. Ala ni biar ni rohanasida, ndang pintor ditanda nasida
Ibana. Gariada tahe, mangangguhi do nasida ala ni biarna, dirimpu nasida do
begu i. Alai pintor dipanghulingi Jesus ma nasida: “Pos ma rohamuna, Ahu do!
Unang hamu mabiar!” Jesus do i.
Dison ma mulai muba sude, i ma di tingki dialusi si
Petrus Jesus songon na mandok, “Tuhan,
molo Ho do i, dok ma ahu ro mandapothon Ho mardalan sian aek i!” Dialusi Jesus
ma ibana, “Ro ma antong!” Jadi haruar ma si Petrus sian parau i. Asal ma sai
dibereng ibana Jesus, boi do ibana mardalan di aek i mandapothon Jesus. Ai
ndada ala naung mapir aek i songon tano, alai ala sai manatap do matana tu
Jesus. Alai dung mulai diida ibana alogo na gogo dohot galumbang na balga, muba
ma rohana. Gabe mulak ma biar do rohana. Gabe ganggu do rohana, jala di tingki
i ma ibana mulai lonong. Alani biar ni rohana, joujou ma ibana, “Tuhan, palua
ma ahu!” Jala pintor disurdukkon Jesus ma tanganNa, ditiop ma ibana, jala didok
ma lambok tu ibana, “E ho, siotik haporseaon; aha ma pola ganggu roham?” Disi
ma nasida nadua mulak tu parau i, gabe so ma alogo i.
Hamu angka dongan sahaporseaon! Sian turiturian on taida
do sada hasintongan na mansai balga: haluaon i ro sian na manghaposi Jesus.
Ndang sian gogo ni hajolmaon, ndang sian usaha na sun denggan, alai sian
habaranion na tongtong manatap Ibana jala manjoujou tu Ibana do. Jala
sasintongna, suman tu si do tong panjahaon parjolo dohot na paduahon na
pinatolhas tu hita sadarion.
Di panjahaon na parjolo, dihilala panurirang Elia do
songon na hinilalahon ni angka sisean ni
Jesus i, i punjung jala loja. Dilului ibana do Debata dibagasan alogo na gogo,
lalo dohot api, alai ndang di si Debata. Gariada tahe, ro do Debata dibagasan
hohom na lambok. Diboto si Elia do, ndang sai ro Debata marhite isara na balga
jala na mambahen tarsonggot manang tarhatotong, alai marhite isara na hohom
jala sesep. Lapatanna, ditogihon do hita asa marpos ni roha, nang pe ndang
tarida Debata songon na tahirim.
Dung i dipatuduhon Apostel Paulus ma roha ni halak na
porsea situtu tu Kristus, na pinatolhas tu hita marhite suratna tu Huria Rom.
Mansai marsak do rohana ala torop dope jolma na so mananda haluaon i. Ndang
holan dirina sandiri dipingkiri, alai diporsan do boban ni dongan marhite
holong na bagas. I ma patuduhon, haporseaon tu Jesus na sai mangonjar roha asa
torus porsea jala mangetaeta angka dongan tu haluaon na manontong.
Simpul ma i sude tu Barita Nauli: di na naeng lonong si
Petrus. Malua do ibana sian na naeng lonong i. Ndang ala ni hamaloonna
marlange, manang gogo ni parau i, alai marhitehite pangurupionni Jesus do, na
mangarahon jala manurdukhon tanganNa tu ibana.
Hamu angka dongan sahaporseaon! Jotjot do ngolunta songon
na ditonga ni tao i. Adong do tingkina tahilala sonang jala gogo hita di
parngoluonta, alai adong do muse tingkina mulai lonong hita ala ni angka
parungkilon: di ripe, ulaon hamasarakaton, sahit, dohot pingkiran taringot
ariari na naeng ro na so tontu taboto. Songon si Petrus do hita, barani do hita
di mulana, alai marsak do hita tingki ro angka halisungsung ni parngoluanta, i
ma angka gulmit ni ngolu na mambahen lomos rohanta. Alai diparhatopot Barita Nauli
sadarion do sada tona tu hita: molo tongtong hita marhaposan tu Jesus jala
joujou tu Ibana, ndang pasombuonNa hita lonong.
Damang dainang nang angka dongan sahaporseaon! Ra olo do
ndang sai margogo hita di parngoluonta. Ra, jotjot do muse hita mardua roha.
Alai na tung mansai ringkot di hita: molo dung mulai lonong hita ala ni angka
parungkilon, ingkon tong do taboto tu ise hita joujou. Jala tongtong do songon
i Jesus: Ndang pasombuonNa hita lonong. Na sai disurdukhoon do tanganNa i laho
manopot jala mangalehon pangurupion di hita. Amen.