ARI
MINGGU NASOMAL XV
Jes
55: 10-11; Psal.65: 10abcd,10e-11,12-13,14; Rom 8: 18-23; Mat13: 1-23
Fr.
Dominikus Sinaga
Rade
ni Roha Manangihon Jala Mangulahon Hata ni Tuhan
Damang
dainang na hinaholongan dibagasan Kristus! Marhite Barita Nauli sadarion na pinatolhas ni
Nabadia Matius, ditogihon do hita saluhutna asa anggiat mangulahon Hata ni
Tuhan dibagasan Parngoluonta siganup ari. Dibagasan Barita Nauli dipabotohon do
tu hita, i ma taringot sada umpama panabur boni. Ditaburhon do boni i tu
inganan na denggan; alai adong na madabu di topi ni dalan, tano na marbatubatu,
di tongatonga ni ramba manang sihupi na marsugasuga.
Adong
do pigapiga impola manang tona na boi tarimangrimangi sian Barita Nauli
sadarion i ma taringot tu holong ni jolma na manabur dohot tano inganan ni
pardabu ni boni i. Na parjolo, i ma taringot Panabur i, i ma Jesus sandiri na
olo manaburhon bibit Harajaon ni Debata tu saluhut jolma. Ibana ndang na holan
pasingothon alai tong do pabaritahon jala manaburhon boni ni Harajaon ni
Debata. Tung balga holong ni Tuhanta Jesus Kristus tu hita ganup jolma ala
diparrohaon do sude ruas ni Debata asa anggiat sude jolma boi manangihon angka
aha na dihalomohon rohaNa.
Jesus
na gabe Panabur ndang hea manadinghon jolma alai sai anggiat ma nian saluhut
jolma manangihon Hata ni Tuhan jala aha na ringkot dibagasan roha ni Debata.
Dibagasan parngoluanNa diajarhon jala ditogihon Jesus do sude jolma asa
mangulahon siulaonna songon na hinalohomon ni Debata. Ibana ndang holan
mangajarhon manang mamaritahon Harajaon ni Debata tu angka halak na malo,
marbisuk, na mora songon halak Parise dohot Siboto Surat alai tu sude jolma
songon halak na pogos, na marsahit, na dipasiding pe disarihon do.
Na paduahon i ma taringot tano na gabe inganan
ni boni Harajaon ni Debata. Angka tano manang inganan na gabe pardabu ni boni i,
i ma roha ni angka na manangihon Hata ni Tuhan. Sude roha ni jolma manangihon
Hata ni Tuhan alai ndang sude mamparateatehonsa.
Boni
na madabu di topi ni dalan i, i ma songon roha ni jolma na manangihon Hata ni
Tuhan alai ndang leleng mian boni i dibagasan rohana ala ni ndang
diparateatehon; ala ni jogal manang tangkang ni rohana jala ndang
dirimangrimangi Hata ni Tuhan.
Dos
ma i songon jolma na rade rohana manangihon Hata ni Tuhan alai ndang marurat
dibagasan rohana. Lapatanna disi, ndang adong hatigoran ni rohana laho
marparateatehon Hata Ni Tuhan alai holan tampilan sambing do
haporseaonna asa diida halak na renta laho tu joro ni Tuhan.
Tano
na paduahon muse i ma tano na marbatubatu. Tano na paduahon on dos ma songon
hita ganup jolma na manangihon Hata Ni Tuhan alai ndang sadia leleng, ndang
diulahon dibagasan parngoluanna. Dos ma songon halak na so tigor marroha jala ndang
togu porsea di Tuhan i.
Tano
na patoluhon muse dos ma songon halak na manangihon Hata ni Tuhan alai ndang
tigor rohana jala gabe ndang mangulahon Hata ni Tuhan dung ro angka sitaonon
dibagasan parngoluanna. Mulak do rohana di na mangulahon angka na dihalomohon ni
daging dung ro angka ihot sian haportibion.
Tano
na paopathon, i ma tano na denggan. Dos ma on songon roha ni angka jolma na
tigor marroha, dohot na togu di haporseonna jala mangulahon Hata ni Tuhan
diparngoluanna siganup ari. Roha na paopathon on tarida sian pangalahona na denggan
gabe parbue ni Hata ni Tuhan dibagasan ngoluna siganup ari. Jolma na manangihon
Hata ni Tuhan, marparateatehon dibagasan rohana jala mangulahon sude angka na
dihalomohon ni roha ni Tuhan jala muse tontong hot di dalan haporseonna tu
Tuhan.
Angka
dongan sahaporseaon! Aha do impola ni Barita Nauli sadarion dibagasan
Parngoluanta siganup ari? Barita Nauli sadarion manogihon hita asa tongtong marhaporseaon
siala balga ni holong ni Debata tu hita saluhut jolma. Tung balga do holong ni
Debata.
Dibagasan
Parumpamaan sadarion tung tangkas do taboto, ndang na gabe Panabur manang boni i
na sega alai tano na gabe inganan ni bibit i do na laho marparbue. Ndang ala ni
so marholong roha Tuhanta Jesus Kristus tu ganup jolma alai saguru tu roha ni
angka na manangihon Hata ni Tuhan i do. Alani i tasungkun ma dirinta be, rupa
tano na songondia do rohanta laho manangihon jala marharposeon tu Tuhan i?
Naeng ma nian hita saluhut mangarimangrimangi songon dia dirinta salaileng on
manangihon Hata ni Tuhan i?
Ditogihon
Jesus Kristus do asa hita nian gabe songon tano na denggan na boi marparbue
dibagasan angka pangalahonta na denggan di parngoluan siganup ari.
Godang
na boi taulahon asa marparbue Hata ni Tuhan i dibagasan dirinta songon lam
marserep roha hita, lam marsitutu hita na manangihon Hata ni Tuhan, margogoi
dibagasan sitaonon; jala hot haporseaonta dibagasan Jesus Kristus Tuhanta.
Alani i, rap ma hita saluhutna mangidohon tu Amanta Debata asa dipargogoi hita
laho mangalo sude angka guga ni rohanta na laho manangihon jala mangulahon Hata
ni Tuhan dibagasan parngoluonta siganup ari. Suang songon i hita pe ditongihon
asa marparbue jala rade rohanta pararathon Barita Nauli di tongatonga ganup
jolma. Songon Hata ni Tuhanta dibagasan Panjahaon na parjolo na dipatolhas
panurirang Jesaya, i ma dipabotohon do tu hita tung so hea gabe so marlapatan
Hata ni Tuhan alai gabe marparbue dibagasan ngolu na manangihon HataNa. Amen