ARI MINGGU NASOMAL XVI
Hab. 12: 13.16-19; Rom 8: 26-27; Mat 13: 24-43 (24-30)
Fr. Marojahan Simamora OFMCap
Habengeton ni Debata na Gok Asi ni Roha
Damang dainang na hinaholongan! Di ngolunta siganup
ari, jotjot do ra hita pintor naeng manguhumi
molo taida halak na asing mangulahon na so denggan, Molo taida jala tahilala pambahenan
na so tigor ra sungkunsungkun do rohanta, ”Boasa ndang hatop Debata manguhum,
patuduhon hatigoranNa?” Nang tu dirinta sandiri, jotjot do tahilala ndang sabam
manang benget hita ala ni hagaleonta dohot dosanta na sai mulakulak. Marhite
panjahaon sadarion, Hata ni Debata manogihon hita asa mangantusi sada parange
ni Debata na sun balga, i ma habengetonNa na gok asi ni roha.
Di Buku Habisuhon i, digombarhon do Debata songon
panguhum na tigor, tingkos jala na marhuaso. Alai, ndang dipangke Ibana huaso i
laho manindos manang manguhum saguru lomo ni lomona. Buku Habisuhon i pe
paboahon tu hita, ia Debata mangajari bangsoNa asa gebe parasi roha ni partigor
i maradophon donganna jolma. Dilehon Debata do partingkian tu angka pardosa asa
marhamubaon. On ma gombaran ni Debata na so hatop manguhumi alai na na rade mangalehon
dalan tu hamubaon.
Taida do muse gombaran na uli di Barita Nauli. Umpama taringot
tu eme dohot simaremeeme i. Digombarhon
do sangkap na naeng pintor mambutbut simaremeeme na tubu di tongatonga ni eme i
asa nian unang adong abatabat na di eme i. Alai didok tuanna i do, “Rap
magodang ma nasida duansa sahat tu gotilon.”
Molo sian hajolmaon, ra sipangoloi do hita tu sangkap
i. Dibutbut ma nian sude angka na so denggan. Ndada gabe mangambati partubu ni
eme i do duhutduhut i? Alai Jesus manghalomohon asa songon roha ni Debata ma
hita mangida donganta. Managam do Debata di hamubaon ni roha di jolma parjahat
di ari na naeng ro. Taida do dosa, alai diida Debata do siala boi do mulak
parjahat i tu hadengganon.
Tung godang do halak nabadia na mangae dosa. Aut sura
Debata marpangalaho hombar tu aturan ni hasabaron ni jolma, ra ndang hea be
nasida marhamubaon. Habengeton ni Debata ndada tanda hagaleon i, alai
hataridaan ni holongNa do i, mangalehon tingki tu ganup jolma asa mulak tu
Ibana. Alai umpama on pe adong do tona singotsingot. Ro ma tingki gotilon,
sirang ma hatigoran dohot hajahaton. Adong do uhuman. Ala ni i, nuaeng on ma
tingki parasian, tingki paubahon roha jala lam magodang di hadengganon.
Di panjahaon paduahon, ditambai Santo Paulus do sada tudos
na mansai mangapuli. Didok ibana, diurupi Tondi Parbadia do hita di hagaleonta.
Jotjot do hita naeng gabe eme na denggan, alai sasintongna tung mansai godang
do jumpangta “duhutduhut” dibagasan dirinta: rimas, pangiburuon, late, ginjang
ni roha, dohot ragam ni hagaleon na asing. Molo tahilala ndang tarbahen hita
muba, mangula do Tondi Parbadia dibagasan rohanta. Molo so taboto pe
martangiang, diondihon Tondi Parbadia do hita marhite angka anggukangguk na so
tarhatahon. Lapatanna, ndang hea dipasombu Debata punjung hita di paraloanta i.
Sabar do Ibana paimahon partubunta, jala TondiNa i torus mangula laho manompa
hita gabe halak na lam songon Kristus.
Angka dongan sahaporseaon! Di keluarga, masarakat,
inganan parkarejoan, dohot huria, jotjot do jumpang hita “eme dohot simaremeeme”
rap tubu. Adong do na marhobas satia, alai adong do na so parduli. Nang di
bagasan dirinta pe, mardomu do sangkap na denggan dohot hagaleon. Dijou do hita
asa torus mangula eme i di ngolunta: holong, serep ni roha, hasatiaon,
pengampunan, dohot panghobasion. Tapasahat
ma uhum na parpudi tu Debata, na umboto roha ni ganup jolma.
Ujungna, ai Debata na sabar do na mangula di ngolunta.
Ndang holan ala ni hagaleonta nuaeng diida Ibana hita, alai ala ni haulion na
boi dapotta molo tabungka rohanta tu asi ni rohaNa. Amen