ARI
MINGGU NASOMAL XIV
Zak.
7: 9-10; Psal. 145:1-2, 8-9,10-11, 13cd-14; Rom 8: 9, 11-13; Mat 11: 25-30
Fr.
Martinus Manullang OFMCap
Tondi ni Patik
Angka
dongan na hinaholongan dibagasan Jesus Kristus! Di Barita Nauli sadarion, didok
Jesus do: “Jangkon hamu ma augangHu, marguru ma hamu tu Ahu, ai na lambok do
Ahu jala na serep marroha, asa dapotan hasonangan tondimuna.” Di halak
Jahudi, ndang na asing hata “auga”. Auga, i ma ulaula na diampehon di
rungkung ni lombu manang pinahan na asing laho mangatur jala mangatur ulaonna.
Di ngolu partondion, auga i manggombarhon patik, paraturan, dohot toktok na
ingkon siihuthon.
Di
tingki ni Jesus, adong do siboto surat dohot halak Parise na mansai ongkong
mangulahon patik na dilehon ni Debata. Marragam Pangalapation na mambahen
godang halak na metmet hera tarbobani . Ummura do nasida diuhumi asa
ditogutogu. Ido umbahen na ro Jesus, ndada laho manesa patik i, alai laho
paulakhon uhum i tu tondi holong, hatigoran dohot parasirohaon. Didok Jesus do,
“ditamondingkon Ho hata i sian jolo ni angka na pistar dohot na marroha,
gabe dipapatar Ho i tu angka siondihononhon.”
Haroro
ini Jesus tu portibi ndada pamagohon patik i. Ndang diajarhon Ibana ngolu na so
adong paraturan. Gariada tahe, dipaulak Ibana do tu sangkap i laho mamboan
holong dohot hatigoran. Ala ni i, auga na pinasahat ni Jesus i ma auga holong,
auga na tongtong manogunogu ngolu alai ndang mamonggoli angka na gale. Didok
Jesus do, “Ai lambok do augangHu jala neang do dohot na hupaporsanhon.”
Di
panjahaon paduahon, tabege do hata ni Apostel Paulus na mandok: “Alai molo
Kristus di bagasan hamu, mangolu do tondi ala ni hatigoran, nang pe mate
pamatang ala ni dosa i.” Dison, dipatuduhon apostel Paulus do, ia ngolu di
halak Kristen ndada na parjolo mangoloi paratur parduru, alai na paloashon
Tondi ni Debata mangula di bagasan dirinta. Halak na holan mangasahon gogona
sandiri, jotjot do marnida patik i songon boban. Imbar ni i, angka na mangolu
dibagasan Tondi i, jumpangsa do paboa ndang holan toktok be mangulahon lomo ni
roha ni Debata, alai nunga gabe hagiot na sian roha.
Di
ngolunta saonari pe, tutu mansai ringkot do paraturan. Ndang boi mardalan sada
bangso molo so adong uhum. Ndang boi huria i magodang molo so adong paraturan
dohot uhum ni huria. Ndang boi keluarga mardomu molo so adong paraturan naung dibuhul.
Nang masarakat na metmet pe ringkot do paraturan asa boi rap mangolu na mardolondolon.
Alai,
sipata boi do paraturan i diulahon sasara ongkong. Adong do halak na hatop
manguhumi holan ala diida adong paratur na dilaosi, so diantusi hamaolon na
niadopan ni donganna. Adong do angka uluan na umringkot laho mamaksahon paraturan
sian na manarihon angka na hansit rohana. Adong do keluarga na mansai mangigil
pangoloion, gabe mago ma holong ni roha.
Angka
dongan sahaporseaon! Di hita halak Batak, tarajumi do ragam ni adat dohot
ruhut-ruhut laho marsaor. Luhutna i marsituhu laho mangaradoti parsaoran dohot arga
diri ni ganup jolma. Alai, ingkon marbisuk do adat na denggan i diulahon, asa
unang gabe boban, baliksa gabe parhitean marsipasangapan dohot marsihaholongan.
Denggan do hita mandok, “Patik do mangarahon dalan, alai holong do mangalehon
tondi ni patik i.” Songon halak na porsea, dijou do hita asa tongtong pangoloi
di angka paratur i, alai unang marroha na tangkang. Ganup paratur na denggan
ingkon mamboan jolma tu hadengganon ni saluhutna, tu hatigoran dohot tu holong
ni roha. Amen