“Parater,
bahen hamu ma jo panorangion taringot Taon Liturgi. Adong muse hubege di Hurianta ragamragam ni Ari Rea.
Sian Yosi br.
Manurung (OMK Stasi Timuran, Paroki Batu V)
Mauliate Ito di sungkunsugkunmuna on! Pangaradeon ni Taon Liturgi di Hurianta gabe sada hasurungan do. Marhitehon i boi ma torang taihuthon pardalanan ni angka hahomion ni haporsesanta. Di parmedar ni taon liturgi, tapatupa huhut tapapatar do hahomion ni haluaonta. Dibagasan liturgi sataon i, diaturhon, diulahon laos dipestahon angka halak na porsea i do ulaon haluaon ni Debata, i ma Tingki Panagamon, Tingki Natal, Tingki Parhobason Paska, Tingki Paska dohot Tingki Nasomal. Ai mamboan rumangna be do i.
Taringot
tu taon liturgi on muse, ra jotjot dibege hamu ragamragam ari rea rupani na ginoaran Pesta dohot Ari Rea. Ari
Rea ma tutu na tumimbo rupani songon na manaringoti Ari Rea Natal, Paska,
Kristus Raja dohot lan na asing. Ari Rea on sajajar ma i dohot Ari Minggu.
Siala ni i ruhutruhut perayaan liturgi pe tung mansai singkop; Ditangianghon
jala diendehon do anggo tangiang hamuliaon, Ahu Porsea, dohot tolu panjahaion. Jala
tung mansai denggan do anggo dipamasa jamita asa tanda ma na tung mansai timbo
rumang ni hahomion na direahon i.
Pesta
sandiri topet di toru ni Ari Rea jala di ginjang ni Parningotan Naingkon (Peringatan Wajib). Sada
hahomion na tarbilang dipestahon i ma Pesta Silang Nabadia, pigapiga halak
nabadia dohot lan na asing. Hasumurungan ni pesta i ma na ditangianghon Hamuliaon alai ndang adong Ahu Porsea jala ndang ingkon dipamasa jamita. Panjahaion pe holan dua
do. Parningotan Naingkon (Peringatan Wajib) sandiri godangan manaringoti angka halak nabadia.
Sahira Misa Nasomal siganup ari do rumangna. Alai, diondolhon ma antong di
tangiang manang di Hata Patujolo halak Nabadia manang hahomion na ditaringoti i.
Godang
do pe nian panorangion na boi sipatolhason. Alai songon i ma jolo panandaion na
boi pinatupa. Mauliate, Horas!