Nunga tung tarbarita tu liat portibi tahe uli ni Tao Toba. Hariada tahe nunga dibahen pamarenta gabe sada inganan na ingkon dijaga dohot diradoti asa lam martambatamba ringgas ni jolma lumobi halak ruar ro marnida Tao Toba on. Topet dijonok ni tao i, adong ma sada huta na margoar Sinabulan. Uli do tong huta on, burju nang angka pangisina. Gabe sitiruon do halaki di huta na asing. Ndang marimbar atik na matua, naposo manang dakdanak, sude manarihon angka donganna. Molo songonon do, so masa ianggo mara.Jongjong do tong huria katolik di huta i. Si Jaringkot do gabe porhangerna. Ianggo parbinotoanna ndang pola disangsihon be. Ai singkola porhanger do nasida tu Doloksanggul. Nang pe songoni, na so masa do di nasida ginjang ni roha. Na lambas marroha do si Jaringkot. Holan sada do hurang na, ndang marna ro si rongkap ni tondina. Huhut ni i, tong do gabe panungkunan ni angka na matua ibana taringot tu ngolu hakatolikon.
Adong ma sada keluarga na imbaru, na naeng marhuta di Sinabulan. Berengon nian, halak na burju do keluarga on. Pintor dijumpangi halaki do amanta kapala dusun. Dijalangi muse ma angka hombar jabunasida. Topet muse sogot nai ari Minggu jala ro do pastortu stasi i. Tu gareja do tong halaki sakeluarga. Pahean ni nasida pe na rara sude, ndang marimbar amanta dohot inanta songoni nang angka gelleng na. Las si tutu roha ni si Jaringkot. Tamba ma ruas ni stasi on, ninna rohana.
Topet tingki manjalo komuni, sai dipanotnoti si Jaringkot amanta i. Ai songon na so somal ibana manjalo komuni. Tangan na siamun di ginjang. Ndang apala diida amanta pastor huroha. Lam tangkas ma muse, ndang dipangan amanta i roti nabadia i. Pintor hatop si Jaringkot jongjong majumpangi amanta i. Ndang bohi muruk dibahen ibana. Dijalo ibana denggan roti nabadia i, jala dilean tu amanta pastor. Maila do nian amanta i ala torop halak marnida.
Dung sae ulaon misa, mambahen tingting ma si Jaringkot. Dipaboa ibana tu angka ruas na asing ise angka parhobas minggu na ro. Ditingtinghon do muse godang ni silua Minggu na salpu. Dung sidung i, ninna ibana ma manguduti hatana, “Damang dainang nang dongan sahaporseaon! Las rohanta ala tamba do bilangan ni dongan ta di huta on.” Martopak angka ruas ala las ni roha na. Ninna ibana muse, “Ale angkup ni las ni roha i, tu keluarga na baru ro tu huta on, ndada holan tu kapala dusun nian mangalapor. Ingkon do tong paboaon mu na, atik na di huria dia hamu margareja. Molo na ruas ni katolik do, bah jumpai hamu amanta pastor di paroki. Las roha nami molo ruas ni katolik do hamu, martambatamba bilangan ni ruas stasi on. Alai ninna rohangku, ndang ruas ni katolik hamu. Ra, ala jonok jabu mu na tu gareja on, bah tu son ma hamu marminggu. Boasa hudok songoni? Tarbereng au amanta on ndang uli tanganna laho manjalo komuni, i pe ndang dipangan roti nabadia i. Molo naeng gabe ruas katolik do hamu, amang, boi do. Ale ingkon marguru do pe hamu pigapiga leleng nai. Asa haporseaon hakatolikan mu na pe botulbotul hot jala pir dibagasan diri mu na.”
Holan i do hata ni si Jaringkot. Las roha ni amanta pastor i, ala toho do hatorangan ni amanta porhanger i. Angka ruas pe sude mangantusi. Ianggo keluarga i, ndang maila be halaki. Las roha na ai di jalo do hape halaki, ndang holan i, diajari do muse. Songonon ma nian huria katolik i, ateh!