){kind=link}
ANGKA PANGARIMANGION MARHITE ANGKA ARI REA DUNG SALPU TINGKI PASKA
Ari Minggu
Pentakosta ima songon simpul manang ujung ni Tingki Paska nabadia. Boi dohonon
Ari Rea Pentakosta manang panjanghonon di haroro dohot hasosonggop ni Tondi
Porbadia tu angka sisean ni Jesus pataridahon sada unok na mampargogoi Huria i
gabe sitindangi di Haheheon ni Jesus Kristus. Hata “Pentakosta” sandiri
lapatanna ari palimapuluhon ndung Hehe Jesus sian na mate.
Alai haulion
ni pangarimangion di Taon Liturgi i lam mamora dope marhite angka Ari Rea na
mangihut di ganup minggu dung Pentakosta i. Manang boi dohonon dung sae Tingki
Paska i adong dope pigapiga Ari Rea na tauluhon na manambai las ni rohanta.
Rupani boi dohonon Ari Rea Debata Sitolusada, Ari Rea Pamatang dohot Mudar ni
Kristus, Ari Rea Roha na Sunbadia ni Jesus Kristus. Udut tusi adong dope dua
nai Ari Rea na mangihut ima Ari Rea Hatutubu ni Nabadia Johannes Pandidi dohot
Ari Rea Apostel Petrus dohot Paulus.
Jempek hata
dohonon, angka Ari Rea on pamorahon pardalanan partondionta: sada togutogu tu
saluhut angka na porsea asa mananda ise do Debata (Sitolusada); paduahon, boha
do tutu Ibana marsaor rap dohot hita (Pamatang dohot Mudar ni Kristus); jala na
patoluhon, tung mansai balga do holong ni rohaNa tu hita (Roha na Sunbadia ni
Jesus). Ra, na olo gabe sungkunsungkun di rohanta, boasa ari hatutubu ni
Johannes Pandidi dibahen gabe ari rea. Alusna ima ala hadirion ni Johannes
Pandidi i do na pataridahon jala na patuduhon tu hita Tuhanta Jesus Kristus.
Ibana paradehon dalan di Ibana. Nunga sian bortian dipasupasu Debata ibana, “Umbege
tabi ni si Maria i si Elisabet manggunjal ma posoposo di bagasan bortianna,
jadi gok Tondi Parbadia ma si Elisabet” (Luk. 1:41). Jala Ari Rea Apostel
Petrus dohot Paulus mansai ringkot di hita ala nasida do songon batu parsuhi na
tarlobi di parngoluan ni Huria i.
Siguriton on
tarlumobi nian naeng patolhashon tu hita tolu ari rea na parjolo ido. Marhite
pangarimangion di angka ari rea i diurupi do angka na porsea asa bagas
manghilalahon dohot mangarimangi hahomion ni ulaon haluaon ni Debata naung
dipapatar marhitehite hasosonggop ni Tondi Parbadia. Marhite Ari Rea Debata
Sitolusada ima Ama, Anak, dohot Tondi Parbadia lam patar ma hita holong ni
Debata. Dung diusehon Tondi Parbadia, Huria mangarimangi holong i na
marharoroan sian hahomion ni Debata Sitolusada. Pangarimangion on mangonjar
hita sude marsomba di adopan ni Debata na Sada dibagasan Tolu Hadirion i, i ma
mual dohot unok ni haporseaon ni halak Kristen. Dung i, tahilala do holong ni
Tuhanta na tongtong marsaor dohot hita marhite Pamatang dohot MudarNa di Pelean
Missa Nabadia. Holong dohot hahomion ni Debata Sitolusada i lam tangkas ma i di
Pelean Missa Nabadia ala tarida situtu disi hadirion na tutu jala real
ni Tuhanta. Pamatang dohot Mudar ni Kristus gabe bohal partondion, na tongtong pangoluhon
dohot pasadahon Huria i di ngolu siganup ari. Jala, Ari Rea Roha Na Sunbadia ni
Jesus Kristus pataridahon asi ni roha ni Debata ndang marnasuda maradophon
jolma. Ima holong i sandiri na gabe sada tudutudu di hahomion ni Debata
Sitolusada.