Si Jaringkot
Di sada paroki, topet di kota Medan, nunga somal dibahen ulaon paska paroki. Sude ruas na di paroki renta rohana mangadopi ulaon i. Dipatupa do tahe angka ulaon, umpamana lomba marende, manjaha bibel, dohot lan na asing. Angka frater sian Siantar do dijou gabe jurina.
Paima
so dapot marsipanganon, dipaisap Ama Joni do sigaretna. Ditogihon nasida do Ama
Sangkot asa adong donganna. “Beta tapaisap jo bah, Lae! Nunga paet hurasa
ijurhu,” ninna nasida tu Ama Sangkot. Las roha ni Ama Sangkot umbegesa. Ai na
sarupa do hape nasida. Sapanghilaan! Dituhor nasida do tong sagalas kopi na
gabe dongan ni sigaret i. Molo Ama Sangkot mandok on ma pasangan na pas,
sigaret dohot kopi.
Nunga
di lapo i hape si Jaringkot manjoloi nasida. Sahalak frater do ianggo si
Jaringkot on. Ndang marisap ibana, holan hundul do ibana disi alani mohopna.
“Bah hamu di, Amang Frater?” Ninna Ama Joni mamangkulingi si Jaringkot. “Olo
bah, Amang!” Ninna si Jaringkot mangalusi. “Bah, jalo hamu sigaret i, Amang!”
Ditambai Ama Joni muse hatana. Dipadenggan si Jaringkot ma parhundul na huhut
didok, “Mauliate ma, Amang. Ndang marisap ianggo ahu. Ai na holan hundul do ahu
di lapo on. Mohop hian hurasa dibagasan aula i. Nunga bornok paheanhu.”
Ia
Ama Sangkot, asing do di rohana. Sai naeng adong do sungkunsungkunnasida molo
jumpa tu sahalak frater. Alai sahalion ingkon beda do sungkunsungkunhu, ninna
nasida di rohana. “Songon on dabah, Frater. Ahu jotjot do mangihuthon barita
taringot hakatolikan on. Di facebook, adong ma sada siguriton ni na
malo. Dibahen nasida do goar ni siguriton i ‘Ensiklik ni Amanta Paus Leo’.
Ndang huantusi taringot i, Frater. Bahen hamu ma jo saotik parbinotoan taringot
i.” Tarsonggot si Jaringkot umbege sungkunsungkun i. Nian adong do las ni
rohana, ala adong dope sahalak ama na botul mamparateatehon ngolu hakatolikon.
Dialusi
nasida sungkunsungkun ni Ama Sangkot i. “Mauliate ma sungkunsungkun on, Amang.
Molo didok Ensiklik, lapatanna sada surat na hinaruahon ni Amanta Paus
tu angka Uskup dohot tu sude ruas. Jotjot do isi ni surat on sada
pangarimangion bolon, pangajarion, manang angka na ringkot tu ngolu
hakatolikon. Ia goar ni Ensiklik ni Amanta Paus Leo i ma ‘Magnifica
Humanitas’. Molo di hata Indonesia lapatanna ‘Kemanusiaan yang Agung’.
Molo didok kemanusiaan yang agung, ra nga taboto aha lapatanni i, ima
naeng mandok sangap ni hajolmaonta i. Taringot tu ngolu hajolmaonta do i.
Marhite Ensiklik on, dipatorang do ngolu ni jolma mardompanghon hamajuon
ni teknologi nuaeng. Jotjot tadok AI manang Artificial Inteligence. Tutu
do tahe, nunga tung jago hian ngolu saonari on. Aha pe tabungha di HP, nunga
boi jala hatop. Alai na gabe sogosogo di hita, jotjot do sala hita mamanghe
hamajuon i. Jotjot do angka barita na so toho tabaritahon. Gabe jotjotan do AI
on na mangarajai manisia. Hape sasintongna, ingkon teknologi do na gabe
sipangurupi di hita. Manisia ndang boi gabe hatoban ni teknologi. Di
tonga ni hamajuon ni AI, tung na so jadi do marganti ianggo ‘tondi’ ni manisia.
Amanta Paus mamangke turiturian taringot tu Huta Babel. Didok nasida, dilehon
do tu hita dua sipilliton, pajongjonghon Babel na imbaru na gok angka late ni
roha dohot hamajuon ni teknologi, manang pajongjonghon ngolu na mangondolhon
Debata jala manisia gabe unok ni parngoluon. Ima na boi hupatorang, Amang.
Impolana, naeng ma nian hamajuon i gabe sipangurupi di ngolu ni jolma siganup
ari, unang gabe mangarajai jala manegai parngoluon,” ninna si Jaringkot huhut
dibondut ijurna.
Tung tarhatotong do Ama Joni dohot
Ama Sangkot umbege hatorangan ni si Jaringkot. “Mauliate godang ma di hamu,
Frater. Las rohanghu umbegesa. Nunga apala tangkas huboto aha na nidok ni Amanta
Paus i. Umpamana nuaeng, molo naeng marpesbuk ahu, bah ingkon denggan do
pangkeonhu i. Sotung gabe lalap ahu di parlalapan alani i. Ndang i tahe? Ninna
Ama Sangkot huhut mengkel suping nasida. Dialusi di Jaringkot songon on, “Tutu
do na nidokmuna i, Amang. Alai, tahe boi do hujalo tes manis di ahu? Nunga
songon na horing aruarunghu,” huhut mengkel nasida na tolu.