Di sada tingki marhuria ma sahalak Pastor tu sada stasi na tung mansai buni. Dao do stasi on boi dohonon sian paroki. Jala di stasi on adong ulaon pardongansaripeon. Ala Katolik dohot Katolik do na laho mardongansaripe i, dipamasa do tutu Missa Nabadia. Alai adong do pigapiga keluarga sian paranak dohot parboru na ro tu ulaon i na so marugamo Katolik. Ndang sanga be manghira piga halak do katolik na laho komuni i, siala tung mansai godang do tingki ni Pastor manghatahatai jala marsijalangan dohot angka ruas na humaliang. Hape nunga lam jonok tingkina naeng pungkaon nama Sakramen Pardongansaripeon i dibagasan Missa Nabadia. Diarahaon Pastor do Amanta Porhanger asa ro tu altar manjononghon Pastor na huhut paradehon angka peralatan Missa. Dung i ro ma Amanta Porhanger tu Pastor i manungkun aha do na ringkot. Marhusip ma Pastor i asa dikira Amanta Porhanger jolo angka ruas katolik na laho manjalo komuni. Dung i laho ma Amanta Porhanger i tu baba ni pintu ni gareja huhut manatap humaliang na torop naung pung di pogu ni alaman ni gareja i. Mulak ma ibana muse tu Pastor na paimahon ibana. “Piga halak, Amang?” ninna Pastor i manungkun. “Ratarata do, Amang Pastor”, ninna ibana jonok tu Pastor i. “E, tahee, sai na adong do,” ninna roha ni Pastor i huhut tarserom.