ARI MINGGU NASOMAL XXII
Jer. 20:7-9; Psal. 63:2,3-4,5-6,8-9; Rom. 12:1-2: Mat.
16:21-27.
Fr. Daniel Simatupang OFMCap
Ndang lomuk na laho
gabe sisean ni Debata! Angka dongan sahaporseaon! Godang do jolma na
marpingkir iaanggo gabe sisean ni Debata, gabe malua ma ngolu sian angka
sitaonon. Hape disurathon do siala anggo
sahalak jolma na jonok manang na lam jonok tu Debata, gabe lam balga do angkaa
aloalo na ro.
Damang dainang dohot angka
dongan sahaporsean! Dibagasan panjahaon parjolo dipapatar do tu hita i ma
tarsingot arsak ni panurirang Yeremia. Disuru
Debata do si Yeremia laho pasahathon tona asa pauba roha sude Bangso Jahudi
siala nunga mandao nasida sian Tuhan. Ingkon do pinsangon panurirang Yeremia
angka partogi, malim nang dohot anak hinumat. Alai di na mandalanhon parungkilan
i, ditulak ma ibana, jala dilesengi ganup ari. Siala i ma gabe didok panurirang
Yeremia ma: “Dihata i ho ahu ale Jahowa, jala olo ahu hataanMu.” Hata ni
panurirang Yeremia on i ma hata na taronjar sian rohana siala dihilala ibana do
na tung mansai borat na mandalanhon parungkilon na sian Debata. Sada habonaron
na pinatarida i ma habalangon maradophon Debata ndang sai torus tonang
parorohon hatonangan. Tontong do margogo panurirang alai ndang ala ni gogo na sandiri, alai marhite
hata ni Debata na pagogohon ibana.
Apostel Paulus, marhitehon
suratna tu halak Rom, manghatai raphon angka ruas naung manjalo Kristus gabe
panobusnasida. Di masa ni Apostel Paulus, halak Jahudi jotjot mangalean pelean
di Joro ni Debata. Apostel Paulus patandahon sada dalan na imbaru: Ndang
pinahan na ingkon di pelehon, alai diri sandiri do na gabe pelean na
mangolu, na badia, pita jala na hinalomohon
ni Debata. Hadaulaton ni na marroha ndang parjolo-jolo tarida sian “ritual”,
alai sian ngolu na dipelehon tu Debata. Ala ni i, ninna Apostel Paulus ma
mandok “Jala unang gabe sarombang hamu dohot portibi on; alai gabe imbaru ma
hamu, dung muba pingngkiranmuna.” Sisean ni Jesus di jou asa barani manimbol
sian gogo ni portibi: ndang holan laba di sahalakna maang tu dirina, alai
ingkon sahat tu pangarimangion “aha na di lomohon Debata”!
Dibagas Barita Nauli
sadarion dipatolhas songo on. Dung diangkui si Petrus Jesus sahalak Mesias,
pintor di paboa Jesus do na naeng laho Ibana tu Jerusalem laho manaon na porsuk
sian angka sintua ni natorop, jala mate ibana bunuon, jala pangoluon di ari
patoluhon. Alai di pingkiran ni si Petrus, sahalak Mesias ngkon pataridahon
diri gabe na monang, na gogo do, ndang sahalak na porsuk.
Alai di tingki diarahon si
Petrus ma Jesus asa unang songgop sitaonon i, gabe ninna Jesus ma mangalusi
“Laho ma ne ho Sibolis!”. Ndang i diuhit Jesus muse mandok “Nasa na giot
mangihuthon Ahu, disoadahon ma dirina, diporsan ma silang na tu ibana; diihuthon
ma Ahu!” Tangkas dipatarida tu hita ubungan ni tolu panjahaon sadarion.
Panurirang Jeremia i ma gombar ni sahalak na marsihohot nang pe mangae
dihilala; Apostel Paulus patoranghon ia anggo habalangon i sada dalan laho
mamelehon diri gabe pelean na hinalomohon ni Debata, jala Jesus patuduhon ia anggo
na laho giot mangihuthon Debata ingkon do diporsan silang tu ibana.
Silang ndang be holan
tanda sidangolon. Silang gabe tanda ni haradeon ni jolma manjalo Kristus di
ngoluna. Silang boi do gabe tanda hot ni roha dibagas ni ruma tangga. Silang
gabe tanda haradeon ni sahalak Kristen na marpartahathon haporseaon na di tongatonga
ni portibi on.
Ninna Jesus do dibagas Barita Nauli “Ai na marhamaolhon
ngoluna, ngolu ni i do na mogot sogot; alai na sumeahon ngoluna ala ni Ahu, i
do jumpangan ngolu sogot.” Marhite Barita Nauli sadarion ditogihon do hita asa
barani marpanunghun hu dirinta be: olo do ahu ro tu Jesus di tingki borat
parngoluanhu? Manang barani do hita mardalan di dalan silang tarsongon naung
diajarhon ni Jesus?
Angka dongan na
hinaholongan! Sai anggiat ma hita boi tarsongon Panurirang Jeremia na olo
mangulahon hata ni Debata, tarsongon Apostel Paulus na mamelehon dirina gabe
pelean na mangolu, jala tarsongon Kristus sandiri na mamorsan silang na laho
paluahon portibi on.
Sai anggiat ma Tuhan
mamasumasu hita. Amen