"DI JOLO NI MALING?" - PARBARITA.com

SAI NA ADONG DO

 Adong ma sada ulaon pamasumasuon di sada stasi na niuluhon ni sahalak Malim. Stasi on antar dao do sian Paroki. Jala ripe na laho pahothon padan pardongansaripeon i pe ndang pala hantus manjaha. Hape asa mardalan denggan ulaon i ingkon ma nian nasida boi manjaha. Nang pe, sasintongna andorang so dipamasa ulaon pamasumasuon i nunga diadonghon di Paroki latihan manang somal digoari GR. Alai ima sipata alani godang ni siulaon dohot sipingkiran sipata olo do gabe lupa tu na rumingkot na laho siparadeon. Jumpang ma tingkina ulaon nabadia. Dibagasan roha ni Malim na manguluhon ulaon i mardalan do annon denggan sude ala nunga diparade be angka na ringkot tusi. Alai andul situtu sian pinarsinta ni roha. 

Di tingki marsiadopan ripe na laho pahothon padannasida i jala ingkon manjaha padan pardongansaripeon i, tung humansinsak do nasida duansa mamereng teks na pinatudu ni Malim. Diarahon Pastor nasida nadua marsijalangan asa jumolo dijahahon pangoli padan i tu na niolina. Alai mengkel suping ibana huhut mangupir tu Pastor i. Pintor sigop do diantusi Pastor i aha na masa, jala asa unang maila nasida dijahahon Pastor i ma asa diulahi ibana mandok: “Di jolo ni Malim…,” ninna Pastor i. Diulahi ibana na nidok ni Pastor ondeng marsoara na gogo: “Di jolo ni Maling…,” ninna ibana. “Ho ma Maling,” ninna Pastor dibagasan rohana, huhut patingkoshon mangulahi mandok, “MALIM”. E,,,, tahe sai na adong do. Na hurang tangkas do ra dibege ibana, ndang i?!