){kind=link}
Unang Tulak Hatiuron!
Damang
dainang na hinaholongan! Dipinsang Jesus do angka huta naung mamereng angka
tanda halonganganNa, alai tong do ndang olo paubahon rohana. Didok Ibana “Marjea
ma hamu” tu Korazim dohot Betsaida ndang ala na so hea diida nasida huaso ni
Debata, alai baliksa ala naung diida nasida i, alai tongtong do tartutup
rohanasida.
Tarsongon sahalak
supir na lilu, diida ibana ma rambu ni dalan manang dibege ibana hata ni
GPS ni HP na tangkas mandok, “Belok kanan 100 meter.”
Alai, sengaja do supir i ndang mamparrohahon i jala laho tu hambirang. Laos
disi ma ibana lilu.
Angka dongan
sahaporseaon! Gariada ditaringoti Jesus do na mambahen longang roha. Didok
ibana, molo Tirus dohot Sidon huta hasipelebeguon na tarbarita di hajahaton,
ala na diida tanda halongangan na sarupa, nunga leleng nasida marhamubaon huhut
manolsoli diri.
Kapernaum i ma
huta inganan ni Jesus magodang tingki ni ngolu dohot panghobasionNa. Dihilala
nasida do siala mansai jonok nasida tu Ibana. Alai marmara do molo jonok so
adong haporseaonna, songon halak na modom di lambung ni api alai tong do
dipasombu ibana ngali ala ndang olo jonok. Las ni roha i adong do, alai ndang
olo nasida parsidohot.
Asa ganup
tingki asi ni roha ni Debata manuktuhi pintu ni rohanta marhite angka Sakramen,
Hata, panogunoguon ni panggora ni roha, manang tiruan ni angka nabadia na
humaliang hita i ma sada joujou naung ro laho mangalusi marhite hamubaon ni
roha na serep.
Songondia do
hita mangulahon on saonari? Pungka ma sian sada langka na metmet: tapareso ma
dosa na jotjot mambahen ganggu rohanta, tabungka ma rohanta di adopan ni
Debata, tapangido ma asi ni rohaNa laho paubahon hita jala tabahen ma sada ulaon
na marhamubaon. Ndang dipangido Debata asa jolo taantusi saluhutna. Holan sada
do pinangidoNa: unang tulak hamu sinondangNa i.
Diajarhon Nabadia
Tomas Aquinas do, ia hamubaon ni roha na sintong tubu sian on do, i ma
parningotan na jujur di hasalaan na salpu, dohot taboto hinametmet ni dirinta
jala jempek do tingkinta di portibi on. Molo jujur hita mamereng angka na
masa, na salpu, ndang lonong hita tu pandelean, alai marsiajar do hita asa
muba. Jala dung tasadari jempek do ngolu on, ndang tapasuda be tingki na tading
i. Sai anggiat ma lam tabungka rohanta tu asi ni roha ni Debata na songon
binsar ni ari manogotna i. Lam tabungka dirinta tusi, lam disondangi ma sandok
rohanta. Jadi unang pola tauhumi dirinta: sadarion ma tingki na arga do i laho
mangadopi Ibana jala paturehon sada langkanta na metmet. Amin.