ARI MINGGU NASOMAL XII (Fr. Dino Gultom, OFMCap.) - PARBARITA.com

 

Ndang Mabiar Ahu, Ala Tuhan do Donganhu

Damang dainang dohot angka dongan sahaporseaon! Selamat Ari Minggu ma di hita saluhutna! Dipanghulingi Debata do  hita sadarion marhite HataNa. Dipaingot do hita asa unang mabiar mandalani ngolunta siganup ari atik pe borat sitaononta.

Di panjahaon parjolo, marhite Panurirang Jeremia dipaingot do hita asa unang dibagasan biar jala ingkon barani laho mangadopi angka na susa di ngolunta. Rupani i mangadopi angka haleaon, panghirimon, dohot angka hasusaon na asing na jotjot mambahen hita gabe mandele. Singotsingot ni Panurirang Jeremia sadarion patoguhon hita saluhutna, asa padaohon panghirimon dohot pandelean sian diri nang parngoluonta. Tuhan ta Jesus Kristus sipalua hita sian angka dosanta mangalehon diri gabe pangusandean di hita. Ai marhite goarNa Nabadia i, hita dipalua sian arsak ni roha dohot sian angka bernit ni parngoluonta.

Suang songon i di panjahaon paduahon sadarion,  dipataridahon do  tu hita balga ni holong ni Debata maradophon hita nang pe jolma pardosa do hita. Apostel Paulus paingothon Halak Rom balga ni holong ni Debata maradophon jolma. Dosa mambahen hita gale jala mandao sian Tuhan i. Alai dosanta na balga i ndang gabe sipangambati di angka pasupasu dohot holong na sian Tuhan Debatanta i.

Damang dainang dohot dongan sahaporseaon dibagasan Goar ni Tuhanta Jesus Kristus! Debata do manompa hita, jala Debata mananda hita. Saluhutna angka na tahaporluhon, na tasiholhon, jala na tapinarsinta diboto Jesus do. Jotjot do hita mabiar jala ganggu rohanta laho mandalani parngoluonta siganupari. Hajolmaonta na gale i, mambahen hita dao sian Tuhan i, jala mambahen hita jotjot madabu tu dosa. Hape adong do Tuhan dalan dohot parhiteanta na rade mandongani hita, di tingki susa manang sonang. Unang ma hita mabiar ala Tuhan do donganta. Saleleng hita mardalan di hasintongan, pos rohanta na ingkon donganan ni Tuhan do hita. Habaranion si songonon i ma habaranion ni sahalak Kristen na tutu. “Ndang mabiar ahu surak, direhei, manang dipadao angka donganhu jolma, molo huulahon ulaonhu dibagasan goar ni Tuhanta.”

Damang dainang dohot angka dongan sahaporseaon! Habaranion patandahon hita marhaporseaon tu Debata. Hasusaan manang bernit ni parngoluon, ndang gabe singkal sipangambati i di hita laho mangulahon angka na denggan. Ra, jotjot do hita padaohon rohanta laho mangulahon angka halomoan ni Tuhan i holan alani biarta direhei manang dipahatahata jolma hita. Gale tondi mangadopi angka sitaonon si songon i. Ndang dope dohot angka hasusaan na asing na mambahen hita maol mangalehon rohanta tu Tuhan i. Nian jotjot do habaranion i diuji. Halak na togu haporseaonna, i do na gabe anak hasian ni Debata. Gale do ianggo dagingta, alai gogo do tondi molo Tuhan do gabe donganta.

Damang dainang dohot angka dongan sahaporseaon! Jesus sandiri ndang manghalomohon hita gabe sahalak parbiar. Holan Tuhan do sihabiaronta. Ai Ibana do na manompa dohot manjadihon hita. Di Ibana do hosanta, daging, nang parngoluonta. Godang ni obuk di siubeonta diboto Ibana do. Godang ni pasir di laut pe diboto Ibana do. Toho ma hita manghabiari Ibana, alai sala situtu do hita molo manghabiari na asing sian Ibana.

Damang dainang dohot angka dongan sahaporseaon! Ndang mura gabe sisean ni Jesus di parngoluonta. Hajolmaon ta na gale i tapasahat ma tu Tuhan i, asa anggiat ma nian Ibana gabe haporusan dohot tudutudu ni parngoluonta. Sada singotsingot di hita i ma asi dohot holong ni roha ni Debata maradophon hita jolma ndang marnasuda. Pir ma tondi, jala tapapos ma rohanta di na mandalani ngolu. Borat pe sitaonon, Jesus do sulu di na golap jala tungkot di na landit. Unang hita mabiar, ai Tuhan do donganta. Songon sada logu na mandok, “Pir ma tondim. Laho mandalani dalanmi. Sai donganan ni Tuhan i do ho di pardalananmi...” Amen.