ARI
MINGGU NASOMAL XXI
Jes
22:19-23; Rm 11:33-36; Mat 16:13-20
Fr.
Audigo Silalahi OFMCap.
Sian
Panandaion tu Pangungkapon
Damang
dainang dohot angka dongan na hinaholongan! Dibagasan parngoluonta, olo do tubu
sungkunsungkun ni anak tu natuatuana songon on, “Oma, adong hepengmu? Nunga
mangan ho, Bapa? Oma, didia Bapa?” Jala godang dope sungkunsungkun na asing. Molo
songon natorasnami, somal do mandok ndang adong hepengna asa unang dijalo. Alai
molo disungkun, “Oma, didia Bapa?” pintor dialusi do, “Di kode an ma bereng Bapamu?”
Nang pe ndang diida, alai toho situtu do alusna i, ala tung ditanda situtu do
hasomalan ni amantana.
Damang
dainang dohot angka dongan na hinaholongan! Dibagasan Barita Nauli sadari on,
adong sungkunsungkun sian Jesus tu hita. Didok do, “Ia hamu, ise do Ahu, didok
hamu?” Molo alus ni si Petrus, tangkas do tatangihon. Didok ibana do, “Mesias,
Raja na pinarbagabaga i do Ho, Anak ni Debata na mangolu.” Molo hita, aha jala
songondia alusta? Alai molo tarimangrimangi do alus ni si Petrus i, aha do
bonsir na gabe dialusi ibana songon i. Alani sisean ni Jesus do Ibana? Manang na,
ala ni somal do si Petrus mangihuton jala manangihon Barita ni Jesus? Ra boi do
dohonon songon i. Alai, aha ma alus ni Jesus umbege panindangion ni si Petrus
i? Ninna do,“Martua do ho, Simon, anak ni si Jona, ai ndada daging dohot mudar
papatarhon i tu ho, Damang na di banua ginjang i do!”
Damang
dainang dohot angka dongan na hinaholongan! Molo tarimangrimangi parngoluonta
saleleng on, aha do na boi tadok tu Jesus molo disungkun ibana hita saonari, “Ia hamu, Ise do Ahu, didok
hamu? “Ise do Jesus di parngoluanmu?” Aha do alusta jala boha do bahenonta?
Songon alus ni si Simon i do dohononta, manang na adong alus na asing rupani
“Jesus i do hangoluan di ahu! Jesus do si parmahan ahu saleleng mangolu di
portibi on!” Manang, “Jesus do Sipalua ahu!”
Damang
dainang dohot angka dongan na hinaholongan! Alus na denggan lam tu dengganna
molo taulahon dibagasan parngoluonta. On pe, sada na porlu botoonta: Ingkon do
taantusi lapatan ni sungkusungkun i, asa boi taalusi dohot denggan. On ma sungkunsungkun
na tung mansai bagas panghorhonna, impolana jala ingkon diadopi dohot
haporseaon na togu. Siala ni i, sungkunsungkun ni Jesus i, ingkon do taalusi
marhitehite haporseaon, hapistaron, dohot holong ni roha.
Damang
dainang dohot angka dongan na hinaholongan! Ndang na laho boi taalusi
sungkunsungkun i molo ndang taboto do rumang ni sungkunsungkun i. “Ia
hamu, Ise do Ahu, didok hamu?” Lapatanna, sungkunsungkun i holan boi taalusi
molo porsea do hita tu Jesus, tatanda ibana marhite tangiang dohot holong. Songon
i nang sungkunsungkun ni dakdanak i, “Oma, adong hepengmu? Oma, didia Bapa?” Lapatanna,
ingkon tatanda do hepeng asa boi taalusi adong manang na ndang adong hepengta.
Jala ingkon do tatanda amantanta asa boi tadok didia ibana.
Asa
boi hita mangungkap ise Jesus i tu saluhut portibi on nang tu Jesus sandiri,
ingkon do hita manghaporseai Ibana dohot mananda ibana marhite tangiang,
mangarimangi jala mangulahon Barita Nauli ganup ari, jala ingkon do tahaholongi
Ibana marhite donganta jolma.
Saonari
tadokma dibagasan rohanta, “Jesus do raja, anak ni Debata na mangolu.” Amin.