Ari Rea Maria Tarhinsat tu Surgo
Pgk 11:19a; 12:1,3-6a,10ab;
1Kor. 15:20-26; Luk. 1:39-56
Fr.
Vanlit Sinaga, OFMCap.
Inanta Maria Tiruan ni Halak na
Porsea
Damang dainang dohot
angka dongan na hinaholongan! Sadarion tareahon do Ari Rea Maria tarhinsat tu
Surgo. Tung lehet do ari sadarion laho mangarimangi parngoluanta marhite tangiang
ni Inanta Maria Nabadia i.
Panjahaon
na parjolo na nienet sian buku Pangungkapon, paboahon tu hita ai nunga be sahat
haluaon dohot hagogoon dohot harajaon ni Debantanta dohot hamuliaon ni Kristus.
Dituriturihon do sahalak boruboru na naeng mangintubu jala sada naga na gabe
musu. Diramoti do parompuan i jala Debata do ianggo Sipaluanasida. Ndang diloas
hamatean i mangarajai parngoluanta. Dipalua do hita sian dosa jala diain gabe
anak dohot boruNa.
Dibagasan
panjahaon na paduahon na nienet sian Surat parjolo ni Apostel Paulus tu halak
Korint, dipatolhas tu hita sada haporseaon, ima nunga hehe Kristus i sian na
mate, jala mangarajai do Ibana. Di Ibana ma huaso dohot hagogoon. Dipasada do
hita dohot diriNa.
Dibagasan Barita Nauli
sadarion, dipatudu Debata do holongNa i tu Inanta Maria. Dipillit Debata si
Maria gabe Ina ni AnakNa. Jala si Maria pe tahe dijalo do tohonan i dibagasan
serep ni roha. Las ni roha na jinalona sian Debata ndada holan di dirina
sambing. Diboan ibana do i tu edana, si Elisabet. Tutu ma tahe, marlas roha do
si Elisabet umbege tabe ni si Maria jala manggunjal do posoposo na dibagasan
bortianna. Dihatahon si Maria do basabasa ni Tuhan i marhite na mandok,
“Dipatimbul rohangu do Tuhan i.” Saonari digoari ma i ende ni si Maria.
Damang
dainang dohot angka dongan na hinaholongan! Maria ndada holan jolma na patut hinormatan,
alai gabe sitiruon. Maria mangajari hita ia dalan laho tu hamuliaon ndang
didapot marhite huaso manang sileanlean ni portibi, alai marhite serep ni roha
jala pasahathon diri tu Debata. Ngoluna gabe tanda manang ise na mangondolhon
Debata dibagasan ngoluna, tung so hea do mandele.
Dibagasan
parngoluon siganup ari, jotjot do tabereng manang taulahon angka ulaon laho tu
hasonangan i. Hape ndang taboto, ai ulaon ni sibolis do i. Inanta Maria
manogihon hita asa porsea tu Debata, atik pe maol dalan na naeng tadalani.
Ndang ingkon sai lomonta na saut. Alai Hata ni Debata, ingkon i do na saut.
Ende ni si Maria i, naeng ma nian gabe endenta i. marlas roha hita siala
basabasa ni Debata. Mariaria tondinta mida Debata sipalua hita. Sai anggiat ma
marhite ari rea sadarion, sai martamba ma haporseaonta, jala Inanta Maria
tongtong mandongani hita. Amin